Şehrîban Aslan

 

AMED - Yew namzeda ciwan ya HDPî Dersim Dage xo bi vatişê ‘Ez bi têkoşîn pîl bîya' da naskerdiş û wina va: "Ganî sîstemê perwerdî bi pêroyî de bêrê vurnayîş. Meclîs de eşkenê Komîsyonê Cinîyê Ciwanan bêrê awankerdiş. Ganî merdimî xo verdê kokê probleman."

 

Yew namzedê ciwan ya HDPî Dersim Dag a. Dersime 22 serre ya û Amed de rêza 8in namzed amî mojnarayîş. Dersime Bismil de 1996 de ameya dinya. Dersime Unîversîteya Artuklu Beşê Edebîyat û Ziwanê Kurdî mezun bîya. Dersime dîyar kerde ke 2012 de bi naskerdişê têkoşînê nasnameyê xo ferq kerda. Dersime va ke aye mîyanê têkoşînî de pîl bîya û bi xêrê keyeyê xo nasnameyê xo yê cinî nas kerda.

 

Dêrsime wina va: "Tirkîya de tercîhkerdişê partiyê alternatîf zêde çin ê. Bi taybet eke merdim cinî bo alternatîf tewr zehmet beno. Mi HDPî sey alternatîf dî. Yewin partîya fikr û nasnameyê mi qebûl kena HDP yo.”

 

'Ganî ma xo veradê bingehê probleman’

 

Dersime arde ziwan ke eşkenê Meclîsê Komîsyonê Cinîyan bêro awankerdiş û tena HDP nê gerek partîyê bîn zî bibê hemkarê nê û wina va: "Ganî cinîyê ciwanî bêrê perwerdekerdiş û rayîr bidê verê înan. Ganî merdimî xo verdê bingehê probleman. Bêguman seba nê perwerde û bername lazim ê."

 

Heto bîn ra Dêrsime da zanayîş ke ganî sîstemê perwerdeyê Tirkîya bi pêroyî de bêro vurnayîş û wina va: "Ciwanî her serê siba bi sîstemêke newe şîyar benê. Bi vurnayîşê sîstemê perwerdî psîkolojîyê ciwanan vindî keno. Gerek sîstemê perwerdî xîtabê ciwanan bikero. Ez veng dana heme cinîyan. Bêrê ma pîya têkoşîn pîl bikerê. Ma reng, veng û têkoşînê cinîyan weçînayîş de vejê merheleyê tewr cor."