MANÎSA - Parlamentera HDPî ya Stenbolî Fîlîz Kerestecîoglu dîyar kerde ke do AKP 24ê Hezîrane de hetê cinîyan ra biqedîyo û wina va: "Ma polîtîkayê ke vernîye şîdetê serê cinîyan gênê, polîtîkayê ke keda cinîyan mojnenê ra û azad kenê pêşnîyar kenê."

 

Parlamentera HDPî ya Stenbolî Fîlîz Kerestecîoglu ke Enqere de namzed ameya mojnarayîş, da zanayîş ke do dorpêçê hemverê HDPî hetê cinîyan ra bêrê şiknayîşî û va reyna cinî û ciwan mekanîznameyê qerar de ca bigîrê.

 

Fîlîze da zanayîş ke HDPî partîyêke cinîyan o û hûmara cinîyan parlamenterî zî mojneno ra. Fîlîze wina va: “Ma cinî bi serran o seba nê dorpêçî bişiknê têkoşîn kenê. Ma çiqas bêrê bêvengkerdiş zî 8ê Adare, 25ê Teşrîna peyêne kuçe de bî û bêveng nêmanê. Ma do tîya ra tepya zî wina bê."

 

Fîlîze bale ante serê weçînayîşî û va AKP vindîkerdiş û krîzê ekonomî de yo no semed ra zî weçînayîş îlan kerdo. Fîlîze qiseykerdişê xo wina dewam kerde: "Derheqê problemê cinîyan de planê HDPî estê. Ma sey rizgarwanan nêcuwîyayî. Ma wazenê cinî azad bibê û çi wazenê pîya bikerê. Ma polîtîkayêke cinîyan azad keno, keda înan vîneno pêşnîyar kenê. Bi taybet do 24ê Hezîrane de AKP bi rayanê cinîyan vindî bikero."