Şehrîban Aslan

 

AMED - Aqûbetê Fehmî Tosuno ke bi wesayîtêke sipî yê Renaultî verê keyeyê ey ra ame girewtiş û reyke bîn zî zanayîş ey ra nêame girewtiş, 23 serrî yo nîno zanayîş. Waya Fehmî, Kiymet Zengîn dîyar kerde ke ê dewlete qetî efû nêkenê û va gelo kesêk înan ra vindî bibayne gelo înan eşkayne wina rehet têbigeyrayne?

 

Fehmî Tosuno ke bîyo sembolê vindîbîyayeyan, têkoşînê keyeyê ey zî dewam keno. Waya Fehmî, Kiymet Zengîne dîyar kerde ke 23 serrî yo heme muracatê înan netîce nêgirewtê.

 

Kiymete dîyar kerde ke birayê aye 1991 de Licê yê Amedî de ameyo tepiştiş û 20 rojî ra dima ameyo tewqîfkerdiş û hîrê serrî hepisxane de mendo û va: "1993an de seba tedayan bi cinîya xo Hanim Tosun û domananê xo dir koç kerd. Dimayê wextê ke reyna ameyî dewe. Dima ra koçê Stenbolî kerdî.”

 

Kiymete dewam de wina va: "19ê Teşrîna Peyêne 1995 de bi embazê xo Huseyîn Aydemîr dir keye ra vejyenê. Eynî roje saete 19.00 de bi wesayîtêke sipî yê Renault ey anê verê berî. Domanê ey vînenê ke Fehmî benê baxçeyê awanî. Fehmî ke cinîya xo paca de vîneno qîreno û vano bêrê mi kişenê. Heta cinîya ey yena ey benê. A roje ra nat ma zanayîş ci ra nêgirewt."

 

Kiymete arde ziwan ke eynî roje de Hanime şina Qerekole Polîsan ê Avcilarî û plakayê ke girewtê danê qerekole û roja bîn şinê Serdozgerîya DGMî yê Beşîktaşî û waştişname danê.

 

Kiymete da zanayîş ke dimayê ci her wext tehdîd û heqaret dewam kerdê û cinîya ey Hanim Tosune çalakîyê Dayikê Şeme de ca girewta û seba nê çalakîyan her gam ameya tepiştiş.

 

Kiymete tewr peynî qiseykerdişê xo de arde ziwan ke ê qetî dewlete efû nêkenê û va kesêke înan ra bibayne vînî ê wina rehet eşkayne têbigeyrayne?