RIHA - Cinîyan dîyar kerd ke 24ê Hezîrane de do tercîhê xo hetê HDPî bikerê û vatî seba sîstemê hemserekî esto raya xo danê HDPî.

Riha de xebatê weçînayîşî bêmabên dewam kenê û waştişê tewr girîng ê cinîyan o yo ke kiştişê cinîyan û şîdet bêro vindernayîş. Cinîyan bale ante serê sîstemê hemserekî û vatî do na gore do rayanê xo bixebitnê.

'Ma do destûr nêdê rayî bêrê diznayîş'

Adalet Çaye da zanayîş ke aye raya xo dana HDPî û wina va: "Ma do rayanê xo bidê HDPî. Ma hetê aştîye yê. Ma wazenê tedayê ke hepisxanan de yenê kerdiş peynî bibê. Do hewl bidê rayanê ma bidiznê la ma do destûr nêdê."

'Raya mi seba hemserekî ya'

Fatma Erîşe zî wina va: "Sîstemê hemserekî tena HDPî de esto. Ez do raya xo bidî HDPî. Gerek weçînayîş peynîya kiştişê cinîyan bîyaro. Ez seba cinîyan edalet wazena. Ma seba cinîyan, ciwanan vanê HDP. Yewin waştişê mi o yo ke kiştişê cinîyan bêro vindernayîş. Ma no semed ra vanê HDP.”

Adle Yildize arde ziwan ke wazena raya xo bêters û teda bi hewayêke azad bixebitno û waşte ke kiştişê cinîyan peynî bibê û asayîş wazenê.

Adîle Korkmaze zî da zanayîş ke seba aştî, aramî û hepsî azad bibê do raya xo bido HDPî û va înşallah do serkewte bibê.