AMED - Parlamentera HDPî ya Edenî Meral Danişe dîyar kerde ke weçînayîşê 24ê Hezîrane tercîhêke mabêne faşîzm û demokrasî de yo û wina va: "Senîn ke hemserekî û hemşaredarî estê çira serekkomarî yew mêrdekî rê bêro verdayîş."

Wekîla sereka Koma HDPî  û parlamentera Edenî Meral Daniş Beştaşe seba weçînayîşê parlamenterîyê Sêrte rê namzedî amî mojnarayîş, sîstemê ‘Hemserekkomarî' danezanayîşê weçînayîşî de ca gêno şîrove kerde. Merale da zanayîş ke Tirkîya û Kurdistan de şertê faşîzmî yenê cuwîyayîş û cinî tewr zêde zulm vînenê bi şîdet, hêrişê zayendî û îstîsmarî dir rî bi rî yenê verdayîş.

Merale va tedayê serê cinîyan roj bi roje zêde benê û vatişê îqtîdarî raste rast bandûre serê komelî kenê û wina va: "Wexto ke mercîyê xo de vajê ‘cinî û camêrdî seyyewbînan nîyê' o wext do camêrdî her ca de eynî çî vajê."

'Do tercîhê mabêne faşîzm û demokrasî de bê'

Merale arde ziwan ke îradeyê cinîyan sindoqan de zaf girîng o û no weçînayîş tercîhê mabêne faşîzm û demokrasî de yo û wina va: "Cinî faşîzman de nê, demokrasî de eşkenê biresê azadîya xo."

'Çira teslîmê yew mêrdekî bêro kerdiş?'

Merale va ke HDP partîya cinîyan o û qiseykerdişê xo wina qedêna: "Ma danezanayîşê xo de heme hetî qalî kerdî. Senîn ke hemserekî û hemşaredarî estê, çira mercîyê serekkomarî yew mêrdekî rê bêro verdayîş? No war de zî eşkeno 'hemserekî' bibo. No weçînayîş eynî wextî weçînayîşê xelisnayîşî yo. Gerek cinî heta 24ê Hezîrane fek heme karê xo ra vera bidê û seba weçînayîşî bixebityê."