MÊRDÎN - Omeryan de cinîyan va do rayanê xo bidê HDPî û sebebê înan tewr girîng zî o yo ke hesabê koyanê înan ke her serre yenê veşnayîş pers bikerê.

Cinîyê Omeryanê Mêrdînî derheqê weçînayîşî de ercnayîşê xo ardî ziwan û dîyar kerdî ke do weçînayîşan de hesabê koyê ke ameyê veşnayîş pers bikerê.

'Yê rayan danê AKPî wa biewnê domanê ke ameyê qetilkerdiş'

Kevser Aydine da zanayîş ke ganî şarê Kurdî ruhê yewîye awan bikerê û wina va: "Ma do sey heme weçînayîşan cewabê AKPî bidê. Ma do her ca kombîyayîşan bikerê, her kesî dir bêrê têhet. Kurd, Ereb, û Tirkî do Omerî de rayan bidê cayêke. Kurdê ke rayan danê AKPî zî wa domanê ke Efrîn, Cizîr û Sûr de ameyê qetilkerdiş biewnê. Her kesê ke vanê ma Kurd ê gerek bêveng nêmanê."

'HDP seba ciwan û cinîyan hêvîye yo'

Wendekara Lîse Rojbîn Kaya zî arde ziwan ke aye hêvî bi HDPî dir vînena û gerek her kes wayîrê sindoqan vejyo û aktîf beşdarê xebatan bibê.

'Ma wayîrê yewbînan vejyê'

Hemdiya Altune zî da zanayîş ke ê seba xo çîyêk nêkerê kes înan rê nêkeno. Her kes dişminê Kurdan o û no semed ra ganî ma yewbînan pê bigîrê.

Şemhîsan Akmane zî wina va: "Wa Kurdî bibê yew. Bi paketêke maqarna û komirî azadî û aramî çin o. Serkewtebîyayîş do ê ma bo. Ma do Rayberê xo Îmralî xelas bikerê. Kes nêeşkeno qayûman, daristanê ke ameyê veşnayîş û koyê ma yê ke ameyê veşnayîş bido xovîrrakerdiş. Ma do hesabê înan weçînayîş de pers bikerê."