ŞIRNEX - Cinîyê Şirnexî dîyar kerdî ke do weçînayîşê 24ê Hezîrane de HDPî ra çar parlamenteran vejê û vengdayîşê wayîrvejyayîşê rayan heme kesî rê kerdî.

 

Weçînayîşî rê wextê ke kilm mend û partîyan namzedê xo pêşkêşê YSKî kerdî. Cinîyê Şirnexî dayî zanayîş ke pêwa qirkerdişê ke ameyê cuwîyayîş, tedayê polîsan do 24ê Hezîrane de wayîrê rayanê xo vejyê û waştişê xo bîyarê ziwan.

 

'Şirnex ewro wayîrê xo nêvejîyo do key wayîrê xo vejyo?'

 

Susin Încî ke mêrdeyê aye serrê 90an de bi îşkence ameyo qetilkerdiş va seba merdişî nêvirazîyê, aştî virazyo, seba zulm nêvînê do her wext têkoşînê xo dewam bikerê û wina va: "No semed ra ma do roja weçînayîşî sindoqan bipawê.

 

V:engdayîşê ma seba heme kesan a. Wa her kes zulmê ke ro ma yeno kerdiş bivîno û wayîr sindoq û rayanê xo vejyê. Rayberê ma bi serran o binê tecrîdî de yo, Selahattîn Demîrtaş bi di serrî yo hepisxane de yo. Seba ma înan azad bikerê gerek ma wayîrê xo vejyê. Wa wayîr rayanê xo vejyê."

 

'Ma do rayanê xo bidê HDPî'

 

Sabriye Kolumane zî arde ziwan ke şarê Şirnexî pêwa heme zulmê dewlete do têkoşînê xo dewam bikerê û wina va: "Heta peynîya gonîya xo ma do heqê xo bigeyrê. Ma Kurd ê, ma do rayanê xo bidê HDPî."

 

Hanîfe Baysale zî veng da heme kesan kerde ke şêrê serê sindoqan û va ê wazenê serekê înan hepisxane ra ganî vejyo û êdî nêwazenê bêrê pelçiqnayîş.

 

Peyruze Dekçî zî wina va: "Ma aştî, azadî, birayî, yewî û bipîyabîyayîş wazenê. Seba nê çi destê ma ra bêro ma do bikerê. Ma do weçînayîş de Şirnex ra 4 parlamenter vejê."

Hacer Edîs: “Şirnex fek têkoşînê xo ra vera nêdano. Ma fek têkoşîn ra vera nêdanê. Ma do heme parlamenteranê xo hepisxane ra vejê. Ma do 4  parlamenteran Şirnex ra vejê. Ma do serê sindoqanê xo ra nêvêsê."