ENQERE - Namzedê sosyalîstî yê rêza cor ê lîsteyê HDPî de ameyê mojnarayîş Tulay Korkut û Dilşad Canbaze dîyar kerdî ke ê do verê têkoşînê sosyalîst, têkoşînê cinîyan zî danê û wina vatî: "Ma xo ra bawer ê, ma do 24ê Hezîrane de qezenc bikerê."

 

HDP yî bi hûmara namzedê cinîyan bale anceno, namzedê înan yê sosyalîst xeylê bi îdia yê. Cinîyê sosyalîst yê ke lîsteyê namzedî de ca gênê, dîyar kerdî ke hemverê tifaqan têkoşîn bikerê û qezenç bikerê.

 

Endama Platfromê Piştdayîşê sosyalîstan Tulay Korkutane ke 2yîn Mintiqaya Stenbolî rêza 5ine de namzede ameya mojnarayîş, dîyar kerde ke mîyanê partîyê bîyaye de yewin partiya alternatîf HDP yo û wina va: "Mi bi serran Keyeyê Piştdayîşî de xebatî meşnayî. Dimayê OHALî bi KHKyan Keyeyê Piştdayîşî ameyî girewtiş. Verê têkoşînê sosyalîst de eynî wextî de têkoşînê cinîyan zî dana."

 

 'Ma xo ra bawer ê, ma do qezenç bikerê'

 

Tulaye qiseykerdişê xo wina dewam kerde: "Enerjîyê danezanayîşî cinîyan vila kerdê zaf berz o. Hemverê di tifaqan potansîyelê ma xeylê zêde yo. Yewin alternatîfê aştîye têduştî paweno HDP yo. Seba namzedîya xo ez zaf kêfweş a. Ez Stenbol ra namzed a. Dimayê danezanayîşî warê ke ma bîyê namzed ma do xebatan bimeşnê. Ma do bernameyê HDPî şaran ra vajê. Ma xo ra bwer ê. Ma do 24ê hezîrane de qezenc bikerê."

 

'Ma do têkoşînê cinî Meclîse de biqîrê'

 

Namzedêke bîn ê sosyalîstê HDPî Dilşad Canbaz a.  Dîlşade ke hemverfeka Federasyonê Meclîsê Sosyalîstan (SMF) û aktîvîstê tevgerê cinîyan 3in Mintiqaya Stenbolî de rêza diyîn de namzed a. Dilşade da zanayîş ke do HDPî de bibo vengê bindestan û wina va: "Ez nasnameyêke sosyalîst ra yena. Goreyê mi HDP xîtabê karker, kedkar, cinî, kêmar, nasnameyê zayendî, LGBTÎyan keno. Prosesêke wina de HDP de ca girewtiş xeylê girîng o. 7ê hezîrane ra heta nika ma hemverê hêrişê faşîzmî têkoşîn kenê. Ma do tecrubeyê xo Meclîse de bîyarê ziwan. Ma do têkoşînê xo yê cinîyan, nasnameyê xo yê sosyalîst Meclîse de biqîrê."

 

'Ma do serkewte bê'

 

Dilşade tewr peynî qiseykerdişê xo de da zanayîş ke ê xerîbê kuçeyan nîyê û va do seba weçînayîşê 24ê Hezîrane bidê berê her kesî ro û va ê a bawerî de yê ke do serkewte bê.