WAN- Cinîyê Wanî yê weçînayîş de rayê xo danê HDPî vengdayîşê 'Ma hemverê sîstemê ke cinîyan nêwazenê, vengê cinîyan birnenê vajê ma tîya yê' kerdî.

 

HDPî yê Enqerî danezanayîşê weçînayîşî weşnayî, bale antî ser têduştîya zayendî û qezencê cinîyan, cinîyan zî vatî ê cewabê hemverê kesê ke înan waran de nêwazenê yê. Cinîyê Wanî ardî ziwan ke no semed ra do rayanê xo bidê HDPî û vatî do bi ruhê seferberî beşdarê weçînayîşî bibê.

 

'Hemverê zîhnîyeto ke ma asteng keno'

 

Pinar Koseoglu da zanayîş ke namzedê HDPî yê serekomarîyê Selahattîn Demîtaş nika hepisxane de yo û wina va: "Ma zanê ke weçînayîşî bi hawayêke demokratîk nêvirazêno. Pêwa nê ma zanê ke rayê ma veng nêşinê. Seba partîya ke Meclîsî de tewr zêde cinî tede ca gênê HDP yo. Ma hemverê zîhnîyetê ke cinîyan asteng keno vanê HDP yo."

 

'Danezanayîşê HDPî cewab o'

 

Cinîya bi nameyê Zeynep Îşlene zî da zanayîş ke AKP ev 16 serrî yo bi vatişê xo yê zayendperest rojeve de yo û wina va: "Welidnayîşê cinîyan ra bigî heta huyayîşê înan her wext serê cinîyan de polîtîkayê zayendperest meşnenê. Ma vanê êdî bes o. Ma hemverê zîhnîyetê nêwazenê cinî vejyê kuçeyan vanê HDP. Ma zîhnîyetê dişminê cinîyan nêwazenê. Danzenayîşê HDPî zî cewab o."

 

Seher Dagli da zanayîş ke ê wazenê ziwanê dayîke rehet bixebitnê, rehet vejyê kuçe û va: "Ez raya xo dana HDPî. Wazena Selahattîn Demîrtaş ganî bêro veradayîş."

 

'Ma tîyayê ma do tîya bê'

 

Fatma Îşleme zî arde ziwan ke sey cinî weçînayîş de baş bixebityê û wina va: "Seba ma qezencê xo peyser bigîrê, ma bi rehet ziwanê xo qisey bikerê, ma nê xebatê weçînayîşî de ca bigîrê. Hemverê sîstemo ke cinîyan nêwazeno ma bimojnê ke ma tîya yê. Bi serran o wazenê vengê ma bibirnê. Ma vajê ‘ma tîya yê û ma do tîya bê."

 

Ganî no sîstem bivuryo

 

Muzeyyen Zîngule da zanayîş ke ganî sîstemo ke esto bivuryo û wina va: "Bi 16 serrî yo îqtîdar zulm ro ma keno. Wazenê merdiman bi vêşanî terbîye bikerê. Merdimî zaf feqîr bî. No semed ra gerek sîstem bivuryo."