STENBOL - Temsîlkarê şarê Çerkezan dîyar kerdî ke do weçînayîşê 24ê Hezîrane de piştdayîş bidê namzedê serekomarîyê Selahattîn Demîrtaş û HDPî û ardî ziwan ke do piştdayîşê înan hetê birayî û têduştîya şaran de bê.

 

Xebatê weçînayîşê 24ê Hezîrane bêmabên dewam keno. Tirkîya de 2 mîlyon ra zêde Çerkezî do rayanê xo bixebitnê. Çerkezî ke seba heqê ziwanê maye û seba qirkerdişê Çerkezan bêro naskerdiş têkoşîn kenê û dîyar kerdî ke do weçînayîşan de piştdayîş bidê HDP û namzedê serekkomarîyê Selahattîn Demîrtaşî.

 

Rejîsore Ayben Altunçe wina va: "Ez cinîyêke Çerkez a. Cinî ya. No semed ra hur di zî tewr baş HDP de yenê temsîlkerdiş. Ez bi HDPî bawer a. Bi serran o ez raya xo dana HDPî. Ez piştdayîş dana HDP û Selahattîn Demîrtaş. Semedo ke mi piştdayîş da înan ez qetî poşman nîya. Ez veng dana heme kesî ke rayanê xo bidê HDPî."

 

'HDP eşkeno Çerkezan temsîl bikero’

 

Handan Demîroze zî da zanayîş ke aye do raya xo bido namzedê hetê heqê merdiman û demokrasî û wina va: "Xeylê waştişê ma sey şarê  Çerkez estê. Bi taybet ma waştêne bi kultur û ziwanê xo bicuwîyê. Şarê ma yê ke ameyê surgunkerdiş kulturê xo vindî kerdê. Ma wazenê kulturê xo bidê cuwîyayîş. Ez tena seba Çerkezan nê seba heme şarê ke Tirkîya de cuwîyenê wazena. Ancax HDP eşkeno nê çî bivurno."

 

'HDP bibo hêvî zî esto'

 

Hîcran Bolat zî bale ante ser weçînayîşan û arde ziwan ke şarê Tirkîya tercîhêke girîng bikero û wina va: "Ez piştdayîş dana HDPî. Ez do seba HDPî bixebityî. HDP heme kîştan temsîl keno. HDP qetî bawerîya mi vindî nêkerd. HDP estbo hêvî zî esto. Ma fek hêvîya xo vera nêdanê."