MÊRDÎNÊ - Mêrdîn de emsar sezonê turîzmî rew ame akerdiş û kar û barê Mêrdînijan zî herî bar kenê. Îstîsmarê serê heywanan ke ci ra vanê ‘bi qedro yê' yenê meşrûkerdiş û seba çopê kuçeyan zî çareserîyêke nîno vînayîş.

 

Mêrdîno ke bi tarîx, ziwan, dîn û kulturê xo dinya de merkezêke zaf girîng o, kuçeyê ey tengan de bi serran o  kar û barê pakîtî û komkerdişê çopî serê pişta heran de yo. Wezîfedarê pakîtî bi hetkarîya 48 heran kuçeyan pak kenê. Wezîfedarî hem şert û mercê xebate û hem zî zor û zehmetîyê ke herî ancenê bi derd ê. Karkerê taşeronî bi pakîtî dir ewnîyayîşê heran ra bigîrê heta viraştişê cilê heran wezîfe serê milê înan de yo.

 

Karkerê taşeronî yê her roje siba saete 06.00 de wirzenê, çop û axur zî tede heme karî kenê la nêeşkenê şaredarî rê waştişnameyêke zî binusnê.

 

Herî mîyanê birînan de mendê

 

Wezîfedarêke nêwaşt nameyê xo bido, dîyar kerd ke hîn heran bi hewayêke baş nîno ewnîyayîş û semedo ke yenê xebitnayîş zehmetîyan ancenê û wina va: "Xeylê heran lingê înan de problemî estê. Veterînerî aşme ra reyke yenê. Herî mîyanê birînan de xebityenê. Bi no hewa ma zî zehmetîyan ancenê."

Şaredarîyê ke heran ra vanê ‘bi qadro’ û wina wazenê sempatî awan bikerê, ne weşîya heran ne zî hewcedarîyê înan yê rojane bi ca ana. Herê ke kuçeyan de çop kom kenê, merdimêke zî espar beno.