Melîke Aydin

 

ÎZMÎR - Elewîyê îzmîrî dîyar kerdî ke Dêrsim hîna 38an cuwîyeno û wina vatî: "Dêrsimî de her wext xoverdayîş, dej û zulm esto. Têkoşînê pî û kalê ma dayê, eke ma nêdê do Dêrsim çin bibo. Do Munzur nêherikîyo.”

 

4ê Gulana 1937 de hetê heyetê wezîran ra qerar ame girewtiş hemver Dêrsimî tevgerê leşkerî virazya û şar ame qirkerdiş. Serê hedîse ra 81 serrî derbaz bîyo la dewlete hema zulmê xo dewam kena. Îdareyê Komeleyê Dêrsimijan ê Bornovayî Hanim Songul Uzundage dîyar kerde ke dewlete bi polîtîkayê asîmîlasyon û qirkerdişê xoza û pîrozbîyayîşê Dêrsimî texrîb kena.

 

'Dêrsim de hema serewedartiş, teda û hema hesirê estê'

 

Songule ard ziwan ke ê sey tornê Seyîd Riza, qirkerdiş xo vîr ra nêkerdê û ne zî danê xovîrrakerdiş û wina va: "Dêrsim de serewedartiş, teda û hema hesirê estê. Çîyê Dêrsim de ameyî cuwîyayîş hema zî dewam kenê. Ma amey nê emrî hema nê rojan cuwîyenê. Sucê ma çi yo, la wa domanê ma rehet nêcuwîyê?”

 

'Ma têkoşîn nêkerê do Munzur nêheriko’

 

Songule dewam de wina va: "Dêrsimî de dejê qirkerdişê Dêrsimijî her roj cuwîyenê. Wexto ke ma şênê dewa xo destur nêdanê. Çira ma nêeşkenê şêrê warê xo? Ma nêbenê yew. Ma têkoşîno ke kal û pîrê ma dayê nêdê do Dêrsim çin bibo. Do Munzur nêherikyo. Dêrsim de merdimî şert û mercê hepisxaneyê akerde de cuwîyenê. Gelek kesî gorey qanûno serbestîyê bi kontrol her roje îmza danê.”

 

‘Awbend û şewatê daristanan dewamê 38an o’

 

Songule peynîya qiseykerdişê xo de wina va: "Ganî ma hemverê awbendan vejyê. Nê waran de gonîya ma rişya, bi hezaran hemwelatî yê ma merdî. Ma do heta peynîya dilopeyê gonîya xo hemverê ci vinderê. Awbendî dewamê 38an nê. Reyna gonî rişêna. Ma bi rastî hema 38an cuwîyenê. Dêrsim de hema dej, zulm û serewedartiş esto."

 

‘Ganî tewr zêde komele bêrê akerdiş'

 

Îdareyê Komeleyê Dêrsimijan ê Îzmîrî Songul Dumane zî da zanayîş ke 1976 de Dêrsim ra koç kerdê û o wext domane bîya û wina va: "Wexto ke ma ameyî Îzmîr semedo ke Dêrsimijî çinbî ma kulturê xo rê xerîb bî. Dêrsim de awbendî yenê viraştiş, têkoşînê tîya qîm nêkeno. Gerek ma her ca de vengê xo berz bikerê. Seba ma kulturê xo xo vîr ra nêkerê komeleyê ma estê. Eşkenê tîya qursê ziwanî bêrê dayîş. Dêrsimê tîya ra yewbînan ra qût bîyê. Gerek bêrê têhet û faliyetan zêde bikerê.”