Hêvî Botan

 

KOBANÊ - Endama Meclîsê Pêroyî ya PYDî  Rewşen Hacime derheqê qerarê Tirkîya ê weçînayîşî de qisey kerde û va: "Ganî şarê ma yê Vakurê Kurdistanî nêrê kayê Dewleta Tirkî û îradeyê xo wayîr vejyê. Dem demê wayîrvejyayîşê îradeyê xo yo."

 

Endama Meclîsê Pêroyî ya Partîya Yewîya Demokratîk (PYD) Rewşen Hacime têkildarê qerarê weçînayîşê rewwext ê Tirkîya qalî kerde û wina va: "Seba Erdogan hem Vakurê Kurdistanî hem zî Rojawanê Kurdistanî û temamê Vakurê Sûrîye de îqtîdarê xo hîra bikero û sîstemo ke wazeno Tirkîya de ganî awan bikero qerarê weçînayîşê rewwext da. Ganî şarê Kurd destûr nêdê fikrê îqtîdaro ke bireso amancê xo."

 

Rewşen Hacime da zanayîş ke no weçînayîş ke seba qedera Kurdan xeylê girîng o û va: "Ganî şarê Kurd bi bîr û bawerîya xo wayîr ro sindoqan vejyê, şêrê serê sindoqan û wayîr ro rayanê xo vejyê. Çunke seba ke hişmendîyê îqtîdarî serkewte nêbo, tîya de vindertişê Kurdan girîng o."

 

'Erdogan wazeno sînorê dewleta tirkî hîra bikero'

 

Rewşene, dewamê qiseykerdişê xo de bale ante serê peynîbîyayîşê peymanê Lozanî û va: "Do serrê vernêya ma de peymanê Lozanî peynî bibo û sînor do newe ra bêrê xêzkerdiş. Erdogan zî wazeno ke peyman goreyê berjewendîyê xo newe bikero. Wazeno destkewtişê Kurdan hedef bigîro û sînorê dewleta tirkî hîra bikero la ganî şarê Kurd hemverê nê bibê yew veng û têkoşîn bikerê."

 

'Tirkîya de heme çî goreyê berjewendîyê yew kesî beno'

 

Rewşene dîyar kerde ke seba cuyake azad ganî Kurdî fek têkoşînê xo ra vera nêdê û qiseykerdişê xo wina qedêna: "Nika pêwa sîyasetmedar, roşnvîr û hunermendan bi hezaran şarê Kurd hepisxaneyan de yê. Çunke Tirkîya de heme çî goreyê berjewendîyê yew kesî beno û yew kes tehemulê vengê cîya nêkeno. No semed ra ganî şarê Kurdî weçînayîş de cewabêke xurt bidê û wayîr îradeyê xo vejyê. Dem demê wayîrvejyayîşê îradeyê xo yo."