Hîkmet Tunç\Dîlan Babat

 

WAN- Sofîa Abdullahzadeya ke rejîmê Îranî ra rema, pêwa heme çî hewl dana ageyro welatê xo.  Sofîa werdê xo ra bigî heta cil û belgê xo kulturê xo dana cuyayîş.

 

Sofîa Abdullahzadeya rejîmê Îranî ke teda keno û heqê cinîyan nasnêkeno rema û amî Wan, hîrê serre verê seba fikr û ramanê xo yê sîyasî mecbur mende Îran ra koçê Wanî bikero. Sofîa Abdullahzade tîya werdê welatê xo viraznena û pê debara xo kena. Meslekê aye esas muhasebe yo û verê ci de ziwanê Farsî, Erebî, Kurdî, Îngîlîzî û Tirkî zî zana.

 

Heme çî aye Îran ra yeno

 

Sofîa cil û belgê xo ra bigî heta werdê ke wena kulturê xo dana cuyayîş û wina va: "Xeylê hacetê ke ez tîya nêvînî zî, ez bi hemkarîya maya xo Îran ra ardena. Ma cîran bê zî kulturê ma cîya yo. Eke rejîmî destur bidayne ma kulturê xo bicuyayne, erjê ma zaf aver bikewtêne."

 

Xeylê nebatî destê cinîyan ra yenê serê sifrî

 

Sofîaye ard ziwna ke Îran hetê ekolojîk de hezar tewir nebatî hewêneno û wina va: "Mi yew tewirêke nê nebatan Wan de nêdî. Ma toximê vilan zî nebatê ke gênê werdî de bixebitnê weçînenê. Toximê ke vilan ra ma gênê estê. Ma ê toximî ra vanê ‘zaferan’. Wexto ke zaferan wişk kenê, sûr beno. Ma kenê awa germin e û pê birincê xo viraznenê û ma sosê goştî viraznenê. HEm boye ci hem zî tehmê ci zaf weş o. Tehmê ci zaf şenik o."

 

 ‘Ez wazena ageyrî welatê xo'

 

Sofîaye peynî de da zanayîş ke heme dewlemendî hetê rejîmê ra yenê çinkerdiş û wina va: "Merdimî deqeyêke nêeşkenê akerde vejyê verê berî. Semedo ke ma multecîyê ma nêeşkenê ageyrê welatê xo. Girewtiş û akerdiş merdimî eleqeder keno. Xeyala mi tewr pîl ez ageyrî welatê xo û azad bicuyî."