AMED - Endama Heyetê Îdarekaranê Baroya Îzmîrî ra Avûkat Îlke Erole dîyar kerde ke hetê muhakemekerdişê sucê îstîsmaro zayendî de lazimî bi bedilnayîşê zihnîyetî esta û wina va: “Sîstemê muhakemekerdişî şaş o û doman xo bêkese hîs kenî. Na rewşe hetê psîkolojîk û resnayîşê domanan de problemêka pîl a.”

 

Teşebusê derbe ra dima OHAL ame îlankerdiş û rewşêka îstîsnayî nika dewre de ya. Îlankerdişê OHALî ra dima her hetan ser de hêrişî zêde bîyî. Îqtîdarê hukmatê AKPyî de îstîsmaro zayendî û şîdeto zayendî zêde bîyî. Hukmatê AKPyî seba tedbgirewtişî xesênayîşê kîmyewî pêşnîyaz keno û na babete de lez dayo xebatan. Yeno plankerdiş ke pêşnûmeyê zêdekerdişê cezayan meclisî ra bivîyarnî û bidî qebulkerdiş. Babete ser o Endama Heyetê Îdarekaranê Baroya Îzmîrî ra Avûkat Îlke Erole qisey kerde û qiseykerdişê xo de dîyar kerde ke ganî kêmasîyê muhakemekerdişî bêrî munaqeşakerdiş.

 

Îlkeye destpêkê qiseykerdişê xo de qala îstîsmaro zayendî ke doman ser de yeno kerdiş, kerde û wina va: “Sucê ke yenî kerdiş, yenî nimitiş. Reaksîyon zêde bibî zî komelî de gamêk apey eştişêk esto. Keyeyê domanan hedîseyê îstîsmarî nimnenî. Keyeyê domanan hetê akerdişê doze de şermîyenî. Ma hetê keyeyan de ca gênî. Ma prosesê huqûqî danî destpêkerdiş. Sucê îstîsmarî do bêceza nêmanî.”

 

‘Sîstemê muhakemekerdişî domanan bêkese vera dano’

 

Îlkeye dewamê qiseykerdişê xo de nê çîyan arde ziwan ser û wina va: “Sîstemê muhakemekerdişî şaş o û doman xo bêkese hîs kenî. Na rewşe hetê psîkolojîk û resnayîşê domanan de problemêka pîl a. Ganî îfadeyê domanê ke rastê îstîsmaro zayendî ameyî, hetê Merkezê Taqîpkerdişê Domanan (ÇÎM) ra bêro girewtiş. Labelê tu bajarê Tirkîya de ÇÎMî çinî yo.”

 

‘Lazimî bi bedilnayişê zîhnîyetî esta’

 

Îlkeye qiseykerdişê xo yê peyênan de zî wina va: “Hedîse û dozê îstîsmarkerdişê doman de çekuyek domanan daxî zaf muhîm o. Vînayîşê dozgerî muhakemekerdişî de zaf bi tesîr o. Baroya ma hetê doman û keyeyê înan de ya.”