Evrîm Kepenek

 

STENBOL - Derhênera ciwan Eylem Kaftane, seba fîlmê xo yê viraştişî kewte tevgere. Eyleme metodê viraştişê fîlmî sey 'zaf bawerî, zaf xebate û fedakarî' bi name kerde û va fîlmviraştoxî derhenerê cinîyan bawer nêkenê.

 

Derhênera ciwan Eylem Kaftane têkilîyê xo yê bi sînema dir awan kerda şibnena bi derzenî adayîşê bîrî. Seba ke gorey Eyleme Tirkîya de metodo yewin ê viraştişê fîlmî yê seba derhênerê cinîyan

 

'zaf bawerî, zaf xebate û fedekarî ya.'

 

Eyleme  bi serran TRT Belgesel de derhênerîya belgefîlman kerda û pêşkêş kerda. Xêrê belgefîlman Artvîn ra heta Îzmîr, Îzmîr ra heta Amed xeylê bajarê Tirkîya şahidîyê hîkayeyan kerda. Wexto ke bernameyê belgefÎlmê ke hîkayeya citkarê bajarwanî viraşto, hîkayeya cinîyêke citkar a Artvînî bandure serê aye de kerdo û dest bi viraştişê fîlm kerda.

 

'Ez seba viraştişî newe ya'

 

Fîlm de cinîyêke sektorê çapemenîye Stenbolî xebityena, seba nêweşîya dayîke xo şina Artvîn û mêsa hingîmênî ewnîyena û têkoşînê cinîyêke bajarwanî pêrodayîşê aye xoza qalî kena. Eyleme wina vana: "Ez her çiqas babeta belgefîlman de bibî pispore zî, la ez viraştiş de hema newe ya. Mi warêke newe de game eşte û xeylê karê newe yê ganî bimusî estê. Sere de zelalkerdişê butçeyê fîlmê viraştişî zehmet o. Nîmeyê butçe hetê wezaretê kulturî ra ame verdayîş."

 

'Piştdayîş dayî tena di derhênerê cinîyan'

 

Eyleme da zanayîş ke serra verê wezaretê kulturî piştdayîş dayo 30 proje û nê projeyan ra tena di hebî derhênerê cinî bî û wina va: "Warê kultur û hunerî de seba ke sektorê taybet aver nêbîyo, seba derhênerê cinîyan problem o. Sektorê taybet de viraştoxî zêde piştdayîş nêdanê cinîyan. Cinîyan ra bawer nêkenê. Seba ke sînema sey warê camêrdan vînenê. Dinya de sera 90 cinîyê ke fîlm antê reya diyîn êdî nêantê. Nê warî tena bi camêrdan sînor kenê."

 

Eyleme dewamê qiseykerdişê xo de arde ziwan ke wexto ke sponsor geyrayê problemêke cuyayê. Eyleme derheqê fîlmî aye 2019 de vejêno hemverê temaşekerdoxan zêde zanayîş nêda û va omîdê aye her wext esto û va: "Me dest bi kar kerd. Ganî merdim bi hîkaye bawer bê. Ez zî pê bawer kena. Derhênerê cinî ganî goreyê camêrdan tewr zêde wayîr moral û motîvasyonî bê."