Şehrîban Aslan

 

AMED- Elmas Tugrula Sûka Saglik Ocagî de dikanî aye esto, yew cinîya ke hukmêvernî şiknena ya. Elmasa ke hacetê hinî roşena, veng da cinîyan ke cuya xo awan bikerê.

 

Elmas Tugrula Sûka Saglik Ocagî yê cehdeyê Sakaryayê Amedî de dikanê ke hacetê hinî yenê rotiş xebityena, yew cinîya ke hukmvernî şiknaya. Elmase dîyar kerde ke bi 7 serrî yo beşdarê cuya xebate bîya û va çîyê ke baş o merdim serê lingan de vinderê û beşdarê xebate bibê. Elmase wina va: "Xeylê reyan ma rastê hukmvernî  'cinî nêeşkenê bixebityê' ameyî. Sere de keyeyî astengî vet la nika kêfweş ê. Ez têkoşînê xo her wext aver bena û ganî cinî xo qetî îfade bikerê. Ganî hemverê camêrdan sere nêtewênê."

 

'Camêrdan nêkerd mi kerd'

 

Elmase ard ziwan ke roja ke dest bi kar kerdo xo ra bawerîya tewr zêde bîya û nê çî vatî: "Vatî karê camêrdan o û ez kar ra ameya dûrvistiş. La mi mojna înan ke çîyê ke camêrdî nêeşkenê bidê ez kena. Mi xo pawit. Her şertî de mi karê xo kerd. Wextê ke mi pereyê xo qezenç kerd ez zaf kêfweş bîya."

 

Elmase peynîye qiseykerdişê xo de arde ziwan ke heta destê aye ra bêro do bixebitîyo û xo aver bero û ganî cinî xo têkoşîn ra nêdê kîşte. Heto bîn ra derheqê babeta pakkerdişê sûke de zî veng da û va ganî problemê lavabo zî çareserî bêro vînayîş.