Gulîstan Azak

 

MELETÎ - Kuafur Selda Gundogane emrê qij de ameya zewicnayîş, serê camê kargerîyê xo de nuştişê 'Ez no kuafurî de tace nêdana sereyê  kesê 18 ra qijan, ez babûne dana sereyê înan' û 'zewacê domanan rê nê' deliqna.

 

Selda Gundogana 35 serrî ke kuafur dana xebitnayîş, hemverê zewacê domanan kampanya da destpêkerdiş. Selda çarçeweya kampanya de nuşteyê sey 'Ez no kuafurî de tace nêdana sereyê kesê 18 ra qij. Ez babûne dana sereyê înan' û 'zewacê domanan rê nê' camê kuafurê xo de deliqna.

 

'Ez tace nê, babûne dana sereyê înan'

 

Selda dîyar kena ke her wext bi kesê ke yenê dikanê aye na babete qisey kena û wazena merdiman bikero wayîrê zanayîşî û wina va: "Ez zî emrê qij de ameya zewicnayîş. Emrê qij de zewicnayîş problem tewr pîl yê welatî yo. La domanê ma hem rastê îstîsmarê zayendî yenê û hem zî hetê keyeyan ra bi zor yenê zewicnayîş. Ez zî bi zorê keyeyî ameya zewicnayîş. La wazena bibî vengê domanan. Ganî bi taybet cinî hemverê  zewacê domanan bêrê têhet û vengê xo vejê."

 

'Veyvikînî medê domananê xo ra'

 

Selda da zanayîş ke bi taybet dawet û rojê taybet de cil û belgê xemilnayîşî û veyvikînîyan danê domanan ra û va: "No zî vernîye zewacê rew akeno. Ganî ma domananê xo veyvikînîyan ra dûr verdê û qetî cilê wina nêdê domanan ra."

 

'Camê mi şiknayî'

 

Selda ard ziwan ke kargerîyê ayeher wext rastê hêrişan yeno û wina va: "Dukana mi her wext rastê hêrişan yeno. Ez nêzana seba karê min o ya zî seba nuştişê min o. La ez qetî dest fek nan û têkoşînê xo ra vera nêdana. Gerek nê hêrişî ma nêtersnê. Ganî ma hîna têkoşîn bikerê. Pêwa ke mi derheqê hêrişê kerra da muracatê dozgerî kerd zî dzogerî eleqedar nêbî. Tirkîya de ne huqûq û ne zî edalet esto."