AMED - Qayûmo tayînê şaredarîya Farqînî bi, bîr û depoyê awa yê seyan dewan bi tehdîdê 'bibê abone' girewt. Ekîbê ke dewan de geyrayî zî dorê bîr û depoyan têl gêrnayî.

 

Yew şaredarîyê DBPî ke ewil qayûm ame tayînkerdiş şaredarîya Farqînî bî û Qeymeqamê qeza Murat Kutuk sey qayûm amebi tayînkerdiş. Qayûm ke xebatkarê şaredarîye kar ra vet, sazgehê cinîyan girewt nika zî dewijan mexdûr keno. Ame zanayîş ke bîr û depoyê awe yê bi seyan dewan ameyî desteserkerdiş û dorê bîran bi têlan ameyê dorpêçkerdiş û dewijan ra vatê bibê 'aboneyê' şaredarî.

 

Dewijî bi serran o bîran û çimeyê awan ra awe xo peyda kenê. Hem hêganê xo hem zî lazimîyê rojane bîran ra peyda kenê. La hewteyê vîyarte de ekîbê DÎSKî dew bi dewe geyrayî û depoyê awe bi boyaxê kewe boyaxkerdî û ser de nuştişê DÎSKî nuştî.

 

Do awe bêro birnayîş!

 

Ekîbê şaredarî ke dew bi dewe geyreynê û dewijan bi vatişê 'bibê abone ya zî ma do awe kok ra bigîrê' tehdîd kerdî. Semedo ke hîn dewijî hemverê têlê ke ameyê antiş vejyayê zî vatê 'Do şaredarî yew xizmet zî tîya nêkero' Dewijan dîyar kerd ke seba ke açernê pere wazenê înan bikerê abone. Dewijan hemverê nê çî reaksîyon mojna ra û vatî kes nêeşkeno hêganê xo awe bido û vatî eke nêbê abone do awe kok ra bibirnê.