MERSÎN- Hepisxaneyê Cinîyan ê Tarsusî bi talîmatê Mudirîyê Pêroyî yê Tevkîfevlerî û Hepisxaneyî hûmartişê serê lingan û leşkerî yenê ferzkerdiş. 100 cinîyan nê caardişan qebul nêkerdî rastê cezaya hucrî ameyî.

 

Hepisxaneyê cinîyan ê L Mersîn-Tarsusî îhlalkerdişê heqan, teda û cezayê dîsîplînî rojeve ra nêvejênê. Tewr peynî hepsîyan bi hemkarîya keyeyanê xo şubeyê ÎHD yê Mersîn, Edene û Amedî ra name eşrawitî û dîyar kerdî ke ê bi cezayê sey pêvînayîş, xeberdarîya aktîvîteyê komelî dir rî bi rî yê û waştişê hetkarîya huqûqî kerdî.

 

Seba 100 cinîyan cezaya hucre

 

Ame zanayîş ke bi aşmêke hepisxaneyê Tarsusî de serê lingan de humartiş yeno kerdiş û  100 hepsî nê caardişan qebul nêkerdê zî rastê cezaya hucre û pêvînayîşî ameyê. Hepsîyan da zanayîş ke bi desan gardîyan reyke de bi kamerayan kewtê koxuşan û hûmartişê serê lingan kerdê kamera û wina vatî: "Caardiş hema zî dewam keno. Prosesê ameyox de bellî yo ke  cezayê giran yê dîsîplînî virazyê. Seba hûmartişê siba û şan de yenê kerdiş asayîşê ganî çin o. Semedo ke xeylê personel konê hûmartişî û ferz kenê ke sey leşkeran bikoy rêze."

 

 ‘Caardişê hêrişan hemverê rumetê merdiman o'

 

Avûkat Gulşen Ozbeke ya bi muvekîlê xo yê hepisxaneyî dir pêvînayîş kerde, dîyar kerde ke waştişnameyêke îtîrazê caardişî kerdî û wina va: "Serê lingan de hûmartiş û nîzamê leşkerî hemverê huqûqî yo. Qanûnê Înfazê Cezaye de yeno dîyar kerdiş ke ganî rumetê merdiman wextê hûmartişî de esas bêro girewtiş. No caardiş hemverê rumetê merdimayî yo."

 

Gulşene peynî de va ke nê caardişî rumetê merdiman qij fîneno û ganî no çî peynî bibo û va waştişnameyê îtîrazî daya dozgerîya hepisxaneyî.