Ronida Hacî 

 

TILTEMIR - Fatma Emîn Reşo û Eyşa Ehmede ke hêrişê artêşa tirk û çeteyanê ci vera mecbur mendî ke herêma Efrînî ra  koç bikerî, dewleta tirkî şermizar kerdî û wina vatî: “Bi tanq, teyara û sîlehanê tewr teknolojîkan hêrişê Efrînî kerdî. Ça heqê merdiman? Nê çîyî zurî yî û gonîyê kurdan heriknenî.”

 

Artêşa tirk û çeteyanê ci 73 rojî yo ke bi tanq, teyara û sîlehanê tewr teknolojîkan hêrişê Efrînî kenî. Netîceyê nê hêrişan de heta nika bi seyan merdimî ameyî qetilkerdiş, bi seyan merdimî birîndar bîyî û bi hezaran merdimî zî ca û warê xo ra koçî kerdî. Vera nê hêriş û qetlîyaman de xoverdayîşê hêzê YPG/ YPJ û şarê Rojawanî zî dewam kenî. Babete ser o cinîyê bi nameyê Fatma Emîn Reşo û Eyşa Ehmede ke vera hêrişê artêşa tirk û çeteyanê ci de mecbur mendî ke herêma Efrînî ra koçî bikerî qisey kerdî.

 

Fatma Emîneya ke hêrişê dewleta tirk û çeteyê girêdayeyê ci vera herêma Efrînî ra koçê Bajarê Tilmirê kerde, qiseykerdişê xo de wina va: “Ma bi omidê agêrayîşê erdê xo cuyenî. Ma mecbur mendî ke ca û warê xo ra koçî bikerî. Dewleta tirk û çeteyê ci  mal û milkê ma talan kerdî û domananê ma qetil kerdî. Hewl dayî ke qetlîamêk pê bîyarî.”

 

Fatmaye dewamê qiseykerdişê xo de bale ante îxlalê heqê merdiman ser û wina va: “Ça heqê merdiman?  Na dewlete xo sey komeleya heqê merdiman biname kena. Tu eleqeya înan û heqê merdiman yewbînan reyde çin a. Dinya qey bêveng a. Ma xeylê zehmetîyan ant û ma xo resan tîya. Domanê ma rayirê koçî de nêweş kewtî. Şarê ma wayîrê ma vejîya û ma ameyî bajarê TilTemirî. Eke TEV-DEM û Kongreya Star nêbîyayêne, ma do teber de bimendêne. Ma do Efrînî dagirkerîya dewleta tirkî ra vera nêdî.”

 

Şarê Efrînî nika seba pawitişê xo cigêrayîşan keno!

 

 Dayika bi nameyê Eyşa Ehmede (79) zî qiseykerdişê xo de wina va: “Mi no emrê xo de xeylê zor û zehmtîyan dî. Ez Homa ra tena çîyêk wazena, wa nê çîyan Erdoganî ra vera nêdo û pirnikê ci ra bîyaro. Erdogan hêrişê erdê ma keno. No dagirkerî yo. Merdim nêeşkeno bê ca û warê xo bicu yo. Ma Erdogan û hêrişan şermizar kenî.”