MERKEZÊ XEBERAN - Nêxweşîya ‘endometrîozîs’ bena sebebê dejê regilî, welidnayîşê domanan asteng kena û sewbîna zî rayirê kîstê malzarokî akena. Cok ra ganî cinîyî dejê regîlî normal nêvînî û peygoş nêkerî.

 

Nêxweşîya Endometrîozîsî se ra 25 welidnayîşê domanan asteng kena û cinîyan de dejê kronîkî vejena raste. Seba ke derheqê nêweşîya  Endometrîozîsî de zanayîş kêmî yî, nêweşî tena hetê 7 doktoran ra yena tedawîkerdiş û heta ke teşhîs yeno ronayîş 8 serrî vîyarenî. Babete ser Prof. Dr. Bulent Urmanî qisey kerd û qiseykerdişê xo de derheqê nêweşîya Endometrîozîsî de zanayîşan pare kerd.

 

Fonksîyonê hak û tupê cinîyan xira kena û rayirê kisirbîyayîşê cinîyan akena

 

Prof. Dr. Bulent Urmanî destpêkê qiseykerdişê xo de wina va: “Nêxweşîya Endometrîozîsî nêweşîya kronîk ya malzarokî de mîyanê herêma pîzeyê corîn de ya. Na nêweşîye eynî wex de fonksîyonê hak û tupê cinîyan xira kena û rayirê kisirbîyayîşê cinîyan akena. Wextê regil û têkilîya zayendî de zî dejan virazena. Na nêweşîye tewr zêde 30-40 serrî ya merdiman de peyda bena.”

 

Bena sebebê kisirbîyayîşî

 

Bulent Urmanî dewamê qiseykerdişê xo de dîyar kerd ke xeylê cinîyî bi na nêweşîya kronîkî kewenî û wina dewam kerd: “Na nêweşîye ge-ge sey ‘Rîşa merdimwere ya xuyê başe’ yena bi namekerdiş. Na nêweşî bena sebebê dejê regilî, welidnayîşê domanan asteng kena û sewbîna zî rayirê kîstê malzarokî akena. Na nêweşîye se ra 5 û 10ê cinîyan de yena dîyîşe. Se ra 25ê cinîyan zî nêeşkenî domanan biwelidnî. Se ra 40 cinîyê ke dejê înan estî de nêweşîya Endometrîozîsî yena dîyîş. Xeylê cinîyî rastê mudaxaleyê cerrahî yenî. Seba tedawî û dermankerdişê nêweşîye, ganî ekîbêk pirspor bibo. Ganî cinîyî dejê regîlî normal nêvînî û peygoş nêkerî.”