Duygu Cinîvîz

 

AMED - Bi beşdarbîyayîşê 32 baroyan ke Baroyê Amedî keyewanîyê ci keno 'Komxebatê Domanan' yeno kerdiş. Komxebate de îhlalkerdişê heqê yê domanan û pêşnîyarê çareserî do bêrê munaqaşekerdiş.

 

Bi vengdayîşê Baroya Amedî de mîyan de Baroya Edene, Semsur û Riha zî estê pêroyî de 32 baro Komxebatê Domanan kenê. Endama Heyetê Rêveberîya Merkezê Heqê Domanan ê Baroya Îzmîrî Avûkat Îlke Erol ke beşdarê komxebate bî û va: "Xeylê çî warê domanan de bêrê kerdiş estê. No semed ra ma do bêrê têhet û têkoşînê xo bimeşnê."

 

'Babeta sereyîn domanê ma yê'

 

Îlkeye dewam de arde ziwan ke warê domanan de derheqê her babete de xebatî yenê meşnayîş û wina va: "Bi taybet babetê îstîsmarê domanan, rewşa domanê tepişnayeyî, domanê karkerî, îhlalkerdişê ke serê medyaya komelî de yenê kerdiş û heqê cuya domanan, heqê perwerde û heqê weşîye do bibê babeta sereyîn yê komxebate."

 

Îlke arde ziwan ke derheqê domanan de ganî seba her kesî bibê babeta sereyîn û hetê ameyoxê welat de sey Peymanê Heqê Domanan de zî ca girewtê gerek sey 'berpirsîyarîyê merdimayî' biro dest girewtiş.

 

'Ganî ma pîya têkoşîn bikerê'

 

Îlke dewamê qiseykerdişê xo de wina va: "Hemverê îhlalkerdişê heqê domanan de têkoşîn yenê dayîş û hêrişê hemverê domanan zî zêde bîyê. Ma sey huqûqnas têkoşînê hemverê îhlalkerdişê heqan de bi qerar û israr ê. Ma her cayê Tirkîya baroyan dir wazenê yewîya hêzî awan bikerê û aver şêrê. Ganî îhlalkerdişê heqan ê domanan de huqûq bi ca bêro. Ganî ma semedê nê çî hewldayîşê xo dewam bikerê. Domanî keye, mekteban û xeylê warê cuyayîşî de rastê îstîsmarî yenê. îstîsmarê domanan komxebate de babetêka sereyîn a. Ma do xebatê xo  bi meslekanê xo dir pare bikerê."