Nafîyeya ke di domanê aye ameyî qetilkerdiş: Hêrsê ma pîl, sereyê ma berz o

  • 12:43 30 Adare 2018
  • HEME XEBERİ

 

ŞIRNEX- Nafiye Kuçuke ke bodrumê Cizîre de di domanê aye ameyî veşnayîş dîyar kerde ke hîna erzîyenê serê keyeyê înan û va: "Domanê mi pers kenê. Bi no hawa dejê ma gane kenê. Se kenê wa bikerê ma sereberz bê û ma do rayîrê domananê xo ra nêvejîyê."
 
Nafiye Kuçuka wextê qedexeyê tebervejyayîşê kuçeyan de bodrumê Cizîre de domanê xo Egît û Fadil (Adîl) vindî kerde, her roje şina taxe û hêvî kena ke çîyêke aîdê înan bivîno. Nafiye seba domananê xo xelas bikero bi desan rey bi beyraqê sipeyan kewte mîyanê pêrodayîşan ro domananê xo geyra. Nafîye wina va: "Domanê mi sere berz şî. Ma do zî rayîrê înan de şêrê. Dayîkan waşt ke domanê xo bigîrê, ameyî astengkerdiş û berdî qerekolan.”
 
Nafîye dewam de wina va: "Lajê mi Egît leşkerî de bi. Semedo ke psîkolojîyê ey baş nêbi, eşrawitîbî keye. Senîn ame qedexeyî dest pêkerdî. O wext vejyabi teber. Ma ro ci geyray û ma va bêro keye. La va bi embazan dir o û nîno. Dima ra vejya meydan ke merdimî bodruman de yê. Wextê qedexeyan de birayê ey Adîl zî birîndar bibê. Ma  waşt ma şêrê verê lajê mi. Ma dayîkê aştîye zî kom kerdî û ma waşt ma şêrê cayê bodruman. Polîsan gaz eşt ma. Telefonê ma girewtî û ma tepişnay. Ma tirkî nêzanayne. Mi hewl da ez derdê xo vajî. Mi va di lajê mi bodrum de yê. Înan zî va ‘Heme PKKyîj ê.' Heqaret kerdî. Bi fekê xo vatî heme kiştê. Ma a şewe qereqol de mendî. Adresê ma girewtî. 250 TL pere ceza birnay. Roja bîn şaredarî de mi televîzyon de nameyê lajê xo Adîlî dî. Vatêne Fadil Kuçuk birîndar o. Senîn mi dî ez nêeşkawa vinderî. Ma bi beyraqê sipey heta cadeyê Nisêbînî şî. La dorê ma girewtî. Ma ra vatî bomba eştê bodruman heme kiştê.
 
'Şew û roj bendê înan menda'
 
Ez û Esmer Tunçe pîya ma verê şaredarî de mendî. MA bi desan rey ro ambulansan geyrayî. Şan de vengê teqnayîşî ame. Bodrum veşnabî. Ma va beno ke domanê ma amebî qetilkerdiş. Semedo ke ma zanayîş înan ra nêgirewtêne. Pîyê înan şi Mêrdîn nimûneyê gonî da. Hewteyêke dima nimûneyê gonîya pîyê ey bi Fadilî dir yew bi. Ma şî Sîlopî ma cenaze girewte. Hema şînê ma dewam kerdêne, roja hîrên de ma zanayîşê cenazeyê Egît girewt. Eynî zulm girewtişê cenazeyê Egîtî de zî ame cuyayîş. Morg pirî cenaze bî. Heme kerdibî poşetan. Numare  dabî piro. Wexto ke cenaze berdêne huyayne. Vatêne 'destê ma weş bo ma kişto'. Ma Egîtê xo zî ard û ma şit. Mela va hewceyê şitişî çin o, ê şehîdê. Rojo bîn qedexe ame wedartiş. Ma waşt ma berê Cizîre la destûr nêdayî. Ez bi domananê xo serberz a. Ez do bi mîrasê înan rayîrê înan de dewam bikerî. Ma qetî înan nêkenê xo vîr ra."