ŞIRNEX - Bi ameyîşê wisarî dir cinîyê koçer dest bi amadekarîya vetişê zozanan kerdî û seba çadire xo bidê ro kewtî mîyanê tevgerî. Cinîyan va: " Ma parçeyê xoza yê. Ma wina ameyî dina, wina pîl bî û wina biciwîyê."

 

Kurdistan de bi ameyîşê payîze ra koçerî ageyrayî dewe û bajaranê xo, bi ameyîşê wisarî dir reyna konê rayîrê zozanan.  Koçerê ke pesê xo dayî verê xo, ked û werdê xo kenê yew û benê parçeyêke xoza. Şemsê û Rabîa Baykara ke 20 serre yo koçerî kerdêne hamnanî zozanê Şirnex, Colemêrg û Wanî de pesê xo çernenê û zimistanî zî yenê mêrgê Sîlopî. Keyeyê ke bi 6 serre yo mêrgê Berojve û Kutnîsî de zimistan derbaz kenê nika xo amade kenê vejyê zozanan.

 

Cinî bi hawayêke kolektîf xebityenê piştdayîşî ke her ca de mabêne cinîyan de esta, tîya zî xo mojneno ra. Beşêke cinîyê koçerî seba konê xo abidê, serê siba rew wirzenê û parçeyê ke Sêrte ra ardê derznenê û yê bîn zî cayê ke parçe bîyê pîne kenê. Cinîyê ke dewê cîya de nişnenê ro, seba viraştişê çadiran yenê têhet û bi nebatê ke mêrge ra kom kerdê zî werdan viraznenê.

 

Seba zozanan amadekarî

 

Rabîa Baykara arde ziwan ke viraştişê çadiran zaf weş o û wina va: "Ma semedo ke konan viraznê ameyî têhet. Ma cinî heme tîya merdimê yewbînan ê. Ma nê çadiran de bi doman û meymananê xo dir manenê. No semed ra çadirê ke ma viraznenê pîl ê."

 

Ma parçeyê xoza yê 

 

Rabîa da zanayîş ke koçerî, cuya mîyanê xoza de ya û bi ameyîşê hamnanî dir raywanîya înan ver bi zozanan dest pê keno. Rabîa peynî de da zanayîş ke ê parçeyê xozayê, wina ameyê dinya, wina pîl bîyê û do wina bicuyê.