Şehrîban Aslan

 

AMED - Bi ameyîşê wisarî dir cinî zî bi xoza dir gane benê. Remzîye Cana ke vejyaya komkerdişê tolike, têkilîyê xo bi herre dir vana.

 

Kurdistan de bi ameyîşê wisarî dir ko, rez, baxçe û dewe, herre newe ra gane bî. Cinîyê seba baxçeyê xo dest bi amadekarîyan kerdî nê rojan de nebatê bi şifayîn kom kenê.  Remzîye Cane ya pey Unîversîteya Dîcleyê Amedî de tolike kom kena.

 

‘Derman feyde nêdano'

 

Remzîye siba rew merkez ra yena dewe û cîyabîyayîşê mabêne dewe û bajar de vana. Remzîye dîyar kerde wexto ke dewe de mendê nêweşî çinîbîya û bi nebatan derman kerdêne û wina va: "Ma nêşîne doktoran. Dermanê ke doktoran dayne zî çîyêk rê feydeyê înan çinbi. Ma nebatan kom kerdêne û derman viraştêne."

 

Remzîye da zanayîş ke bi serran verê dewe ra ameyê bajar û va: "Ez ewro ameya dewe sey newe ra ameya dinya. Boya vilan, herre zaf weş a. Ma bajar de mîyanê çar dêsan de yê."

 

Bereketê herre...

 

Remzîyeya ke tolike kom kena wina vana: "Ma bi kardî kom kenê. Dima ra ma keyde werdê kenê û şonê, pewjnenê. Dima ra ma rûn de sûr kenê û wenê. Zaf weş a. Seba xeylê nêweşîyan zî baş a. Pişîke rê zaf baş a. Seba kuxike, bronşît û vengî zaf baş a."