Safiye Alagaş

 

AMED - Cinîyê Amedî dîyar kerdî ke TSK û komê girêdayê ci Efrîn de dizdî kerdê û wina va: "Ewro Efrîn de tu çîyêk nêqedîya, nêvînenê ke heme çî newe dest pêkerd."

 

Reaksîyonê hemverê dagirkerdişê bajarê Efrînî yê hetê TSK û komê girêdayî ra ameyo dagirkerdiş dewam kenê. Cinîya bi nameyê Nezîfe Denîze dîyar kerde roja ke hêrişan dest pêkerdo heta nika reaksîyon ameyê mojnarayîş û va şarê Efrînî ameyê qetilkerdiş û herra xo ra ameyê kerdiş. Nezîfe va kurdên vakur bi hawayêke zaf hemverê hêrişan xo ver nêdayê.

 

Nezîfe dewamê qiseykerdişê xo de wina va: "Ganî kurdî pîya têkoşîn bikerê. La ma wina nêkenê. Problemê ma o yo ke ma têkoşîn hempar bikerê. Eke ma tîya têkoşîn nêkerê ma do eynî çî bicuyê. No semed ra gerek ma vengê xo berz bikerê."

 

'Şarê Efrînî do ageyro herre xo ser'

 

Şehrîban Zugurlu zî da zanayîş ke hêrişê hemverê Efrînî û tecrîdê serê Rayberê PKKî Abdullah Ocalanî yewbînan ra cîya nîyê û wina va: "Şarê Efrînî girêdayîşêke pîl Abdullah Ocalanî rê mojnayî ra. Semedo ke nê girêdayîş bêrê vindîkerdiş qirkerdiş yenê kerdiş. Şiknayîşê komployê serê Abdullah Ocalanî de rolê şarê Efrînî pîl o. Serê Abdullah Ocalanî de tecrîd yeno kerdiş û no dir zî hemverê şarê Efrînî hêriş virazênê. Tecrîd û hêrîş berardişê eynî zîhnîyetî yê."

 

'Yê ke vanê qedîya nêvînenê ke newe dest pêkeno'

 

Şehrîbane bale ante serê vatişê serekkomar Tayyîp Erdogan sey ‘Ma bikoy Efrîn do heme çî biqedîyo' û wina va: "Ewro Efrîn de tu çîyêk nêqedîya. Yê ke vanê qedîya do bivînê ke heme çî newe dest pêkeno."

 

'Do tewr peynî şar Erdogan bifîno'

 

Yuksel Gultekîne zî wina ard ziwan: "Ez bêvengîya dinya şermezar kena. Ma reyke bîn zî fam kerd ke dostê Kurdan çin ê. Wexto ke dore yena Kurdan zî heme benê yew. Partîyê sîyasî hemverê Kurdan benê yew. Wexto ke dore yena Kurdan dinya bêveng manena. Do aqûbetê Erdogan bibo sey Saddamî. Şar do Erdogan bifîno war."

 

Cinîyêke bîn zî nêwaşt nameyê xo bido zî ard ziwan ke Tirkîya û komê girêdayê ci kewtê Efrîn û dizdî kenê û va: "Nê çeteyê dizdî yê. Şîyê Uca dizdî kenê. Seba malê dinya şîyê. Ma vatêne ê lehengê la ma çara zanayne ke ê dizdî kenê."