Sozda Oremar-Lîlav Elî

 

EFRÎN - Hêriş û dagîrkerîya artêşa tirk û çeteyanê ci roja 65. de dewam kenî û nê hêrişî resayî merhaleyêko krîtîk. Heta nika bi seyan sîvîlî ameyî qetilkerdiş û hendêna zî birîndar bîyî. Dr. Dilgeşe Almanyaye ra seba piştîdayîşî ameya Rojawanê Kurdistanî  û piştîdayîşê Xoverdayîşê Seserre xo rê sey wezîfeyêk vînena.

 

Hêriş û dagîrkerîya artêşa tirk û çeteyanê ci roja 65. de dewam kenî û nê hêrişî resayî merhaleyêko krîtîk. Heta nika bi seyan sîvîlî ameyî qetilkerdiş û hendêna zî birîndar bîyî. Dr. Dilgeş Kerkûkîye Almanyaye ra seba piştîdayîşî ameya Rojawanê Kurdistanî  û piştîdayîşê Xoverdayîşê Seserre xo rê sey wezîfeyêk vînena. Babete ser o Nêweşxaneyê Avrînî ra Dr. Dilgeş Kerkûkîye ke Ewropa de cuyayêne û vera xo daya Efrîn û bi hawayo zerrîye xebetîyena, qisey kerde.

 

Dilgeş Kerkûkîye qiseykerdişê xo de dîyar kerde ke badê ke Nêweşxaneyê Avrînî ame bombekerdiş, ê derbazê Şehba bîyî û wina dewam kerde: “Ma tîya de mîyanê şarî de yî, labelê ti malzemeyê ma yê weşîye çin î. Ma tîya de mîyanê şarî de yî û ma nêşênî cewab bidî lazimîyanê şarî. Tena ma eşkenî moral bidî înan. Ez veng dana kurd û hêzanê mîyanneteweyîyan. Destekdayîşê Efrînî wezîfeyê ma hemînan o. No wezîfeyêko neteweyî yo. Eynî wext de xeylê dezgeyî hetê mîyanneteweyî de hetkarîye gênî. Miletê Yewbîyayeyî û Rêxistina Weşîye ya Dinya kura de yî? Nika zî wazenî ma nê erdan veng bikerî.”

 

'Xizmetê seba şarê Efrînî wezîfeyêko pîroz o’

 

Dilgeşe qiseykerdişê xo yê verênan de wina va: “Ez Almanya de cuyayêne û mi qerar daye ke ez bêra tîya. Ez seba xizmeê weşî ameya tîya. Çimkî seba mi xizmetê weşî pîroz o. Ez Nêweşxaneyê Efrînî de bîya şahidê xeylê hedîseyan. Manevîyat û îradeyê şarê Efrînî hêz dayî mi.”

 

'Ganî dinya bêveng nêmana û vernîya Enfalê newe bigîra'

 

Dilgeşê dewamê qiseykerdişê xo de bale nate qetlîamê Enfalî ser û wina va: “Qetlîamê Enfalî hetê Sedam Huseyînî ra amey viraştiş û bi hezaran kurdî ameyî qetilkerdiş. Tarîxê kurdan bi qetlîaman dekerde yo. Dinya qetlîaman temaşe kena. Ganî dinya bêveng nêmana û vernîya Enfalê neweyan bigîra.”