Fîlîz Zeyrek

 

EDENE - Cinîyê karkerê ramitişî yê Kobaniyîjî ke semedo ke herra xo terk kerdî vatî: "Ma bende bî ke zulmê DAIŞî biqedîyo la nika Tirkîya merdimî Efrînî dana koçkerdiş. Wa kes herre xo terk nêkero."

 

Tirkîya de bi hezaran cinîyê semedê polîtîkayê şer serrê 90an de koç kerdî, serê erdan de xebityenê, nika zî Sûrîye ra xeylê kesî koçê Çukurova kenê. Cinîyê ke tîya kewtê mîyanê sîstemê mêtînger ê bîn, her roje siba ra heta şan de yenê xebitnayîş.

 

'Ma sey koleyan vînenê'

 

Kadrîye Ahmeta Kobaniyîje ke mintiqaya Kara Ahmetlîya qezaya Yuregîrê Edene de baxçeyê fêkîyan xebityena, 5 serre yo Kobanê ra koç kerdo. Kadrîye û keyeyê aye seba hêrişê DAÎŞî ra remayê koçê Edene kenê. Kadrîye ke serê siba saete 05.00an de wirzena yena baxçe wina vana: "Heta şan de ma karê înan kenê. Çawîşî serê ma de vindenê û vanê 'mevinderê bixebitîyê'. No zî teda û acisbîyayîşêke cîya virazneno. Şan de zî ma werd, pakîtî, domanan ra ewnîyenê. Pêwa hende kede rojaneyê ma 54 TL yo.

 

'Çîyê ke ma cuyayê wa ey nêcuyê'

 

Kadrîye ard ziwna ke waştişê aye o yo ke ageyro serrê herra xo û wina va: "Nika wazenê eynî çî Efrîn rê bikerê. Koçberkerdiş serê şarê uca rê ferz kenê. Sebebê bi çimsurîyêke pîl qetilkerdişê domanan zî o yo. Ma koçberê tîya kerdî û nika keda ma mêtînger kenê. Ma ameyî û wa şarê Efrînî nê çîyan nêcuyê. Warekna ma qetî nêameyne tîya."

 

Domanî mecburê bixebityê

 

Dîyara 12 serrî zî Kobanê de newe dest bi mektebe kerdebî la mecbur mende ke koçê Edene bikerê. Dîyare zî wina va: "Gerek ez nika mektebe de bibayne. Ez wazena ageyrî Kobanê. Ma şer cuyayî û xeyalê ma pelçiqnayî. Êdî bes o, ma wazenê no şer biqedîyo. Ez zî rew wiştiş rê acis bîya la mecbura bikerî."

 

'Ma 12 saetî xebityenê'

 

Selîme Aslana serrê 90an de dewa înan ameya veşnayîş zî dîyar kerde ke pêwa hende serrî derbaz bîyê zî polîtîkayê hemverê Kurdan nêvuryay û wina va: "Bi 25 serrî yo ez serê erdan de xebityena. Mi kedêke pîl da. Ez nika zî dana. Warê ma zaf weş bi. Baxçeyê me estbi. Ma goreyê xo ramitiş kerdêne. Problemê debare çin bi. Tîya rastî zî zehmet o. Semedo ke ma hende kede danê zî ma vera ci nêgînê. Ez roje de 12 saetan xebityena. La vera kede xo nêgîna. Asayîşê weşîya ma zî çin o."

 

'Wazenê hêrişê heme Rojawanî bikerê'

 

Fatma Saleha Kobanîyêje dîyar kerde ke înan hêvî kerdêne şer biqedîyo la nika eynî şer Efrîn de yeno meşnayîş û va: "Ma fikrîyenê ke ageyrê keyeyê xo. La nika hêrişê Efrînî kenê. Wazenê hêrişê heme Rojawanî bikerê. Efrîn seba ma cayêke zaf girîng o. Ma tîya kerdê sey koleyan. Ma pereyê kîra, awe, ceyran û tupe qezenç kenê. Xêrcê ci çîyêk bîn nêkenê. Cuyayîş zaf zor o. Wa şarê  Efrînî nikoy na rewşe."