Sozda Oremar

 

EFRÎN - Cinîyê Efrînî ke hemverê hêrişê dewleta tirkî yê serê Efrînî de têkoşînê pawitişê nasnameyê xo dewam kenê, ardî ziwan ke fek têkoşînê xo ra vera nêdanê û ê do bi têkoşînê xo do reyna ageyrê serê herra xo yê Efrînî."

 

Cinîyê Efrînî ke seba hêrişê dewleta tirkî yê serê Efrînî, derbazê Kantonê Şehba bî, ardî ziwan ke ê fek têkoşînê xo ra vera nêdanê û ê do bi têkoşînê xo reyna ageyrê serê herra xo ya Efrînî."

 

Nesrîn Huroya ke wayîrê 4 domanan a û semedê hêrişê dewleta tirkî yê serê Efrînî, qezaya Bilbilî ra derbazê Şehbayî bî ard ziwan ke pêwa heme zor û zehmetîyan ê serê linganê xo de vindenê û têkoşînê xo dewam kenê.

 

Nesrîna ke seba domananê xo bipawê derbazê Şehba bî û wina va: "Wexto ke ma Bilbil de bî netîceyê hêrişê dewleta tirkî de xeylê sîvîlan verê çimanê ma de cuya xo vinî kerdî. Mîyanê sîvîlê ke cuya xo vinî kerdî mîyan de domanî zî estbî. Keyeyê Bilbilî hem ganê xo ra hem zî keye û herre xo ra bî. Keyeyê ke hetê keyeyan ra bi serran û bi kedêke pîl ameybî viraştiş, hetê dewleta tirkî ra ame rijnayîş. La pêwa heme zordestîyan şarê Efrînî reyna zî xo ver danê."

 

Nesrîne wina va: "Binê vengê top û varan de binê vartî û seqemê zimistanî de mi domanê xo girewt û derbazê Şehba bîya. Serdemê ke ma Efrînî vejyayne dewleta tirkî bi bombeyê hêrişê sîvîlan kerd û xeylê sîvîlî cuya xo vinî kerdî. Domanî verê çimanê dayîk û pîyê xo de ameyne kiştiş. La reyna zî şar fek têkoşînê xo ra vera nêda."

 

Nesrîne tewr peynî wina va: "Waştişê ma o yo ke bêvengîyê hêzê mîyanneteweyî yê hemverê dagirkerdişê Efrînî peynî bibo û heme kesî erjê xo yê seba pawitişê heqê merdiman bi ca bîyarê."

 

'Efrîn cayê xoverdayîşî yo'

 

Ehlam Hesena 21 serrî ard ziwan ke dewleta tirkî her roje bi teyareyan hêrişê Efrînî kerdêne û ard ziwan ke ê bîyê şahidê her tewir hovîtî û va: "Efrîn cayê xoverdayîşî yo. Şarê Efrînî tu çîyêk ra nêtersenê. Şarê Efrînî evîndarê azadîya xo yê. Herra Efrînî bi gonîya şehîdanê ma ameya awdayîş. Ma gonîya şehîdanê xo erd de nêverdenê."

 

'Ça heqê merdiman û demokrasî?'

 

Necah Ebdula zî arde ziwan ke bi hêrişan do nêresê amancê xo û wina va: "Domanê ma qetil kerdî. Çeteyê wehşî verdayî serê herre ma û Efrîn talan kerdî, Efrîn de dizdî kerdî. Wexto ke na dinya de babete bena Kurd, edalet nêmaneno. Verê çimê heme dinya de bi rojan heme şarê Efînî ameyî qetilkerdiş û qrikerdişî dir rî bi rî mendî. Heme kes ker, lal û kor bîyê. Dinya kor û lal bîya. Ça heqê merdiman û demokrasî? Êdî bawerîya ma seba nê çî nêmend. Erdogan nêeşkeno îradeyê ma bişikno."

 

'Erdogan embazanê ma qetil kerd'

 

Heto bîn ra domanê Efrînijî 8-9 serreyî wina vatî: "Erdogan mektebe ma veşna û embazê ma qetil kerd. Ma tena çîyêke Homa ra wazenê ke çîyê ke ê anê sereyê ma, bêro sereyê înan zî."