Fîlîz Zeyrek

 

EDENE - Gencay Devecî ya ke seba digane ya nêweşxaneyê taybet de xebityena kar ra amî eştiş wina va: "Hemverê mêtîngerîyê kede û nêheqî ma do bi cinîyan dir têkoşînê xo dewam bikerê.”

 

Gencay Devecî û Razîye Sevgîlî yê qezaya Çukurovayê Edene de Nêweşxaneyê Welidnayîşê Cinîyan ê Taybet Gulzelyali xebityenê, bi sebebê di ganeyê kar ra ameybî vetiş. Gencaya ke sey sekreterê Tibbî xebityayne dîyar kerde ke ê roja 8ê Adare Roja Cinîyê Dinya de kar ra ameyê eştiş û wina va: "Çîyo ke tewr zêde ez xemgîn bîya no bi. Semedê zîhniyetê camêrd ez karê xo ra bîya. A roje ez keye de nişta ro û bi saetan ez bermawa."

 

'Ma do qerarê xo bidê, şima nê'

 

Gencaye dewam de wina va: "9 serre verê zî reyna seba digane bîya, ez nêweşxane ra amebîya vetiş. O wext mi vengê xo nêkerd la nika ez vana bes o. Ma cinî goreyê kesan domanan nêviraznenê. Seba ke ma pîzey xo mird bikerê, ma destûr nêdenê ke şew û roj keda ma bêro pelçiqnayîş. Ma cinî ma do bi îradeyê xo heme çî bikerê. Ma do qerarê xo bidê şima nê."

 

'Mudaxaleyêke şaş o'

 

Gencaye wina va: "No mudaxale tena mi rê nê heme cinîyan ameyo kerdiş. Dimayê çîyê ke ameyî sereyê mi ameyî eşnawitiş, bi seyan cinîyan mesaj mi rê eşrawitî. Ro mi geyrayî û vatî 'ma verê to de yê'. Sektoro taybet heqê ma destê ma ra gêno. Ma êdî tena nîyê. Ma cinî heta ke heqê xo nêgîrê ma dima ra game bierzê.

 

'Ma peynî karê to anê'

 

Gencay qiseykerdişê xo wina dewam kerde: "28ê tebaxe de mi dest bi kar kerd. Wexto ke mi newe dest pêkerd nobete de 24 saetan xebityayne. Vatî ma verê roşanî nêeşkenê sîgorta bidê destpêkerdiş. Verê 21ê Êlule dayê destpêkerdiş. Xora ma zehmetî kar vînenê. Mi zaf karê xo ra hes kerdêne. Peynîya Sibate de ez musawa ke ez 4 aşmî digane ya. Dimayê mesajêke ez musawa ke sîgortaya mi dayê vindernayîş. Pêvînayîş de vatî 'ma ver bi qijî de şinê û peynîye karê to anê'. Serê nê de mi kar ra vetî. Rojêke verê zî embaza mi Raziye Sevgîlî zî semedo ke digane bî kar ra amî eştiş.

 

'Eke şima digane manenê şima çira xebityenê'

 

Gencaye dîyar kerde ke seba meaşê betalî bigîro şî ÎŞKUR, la musaya ke nêweşxane ÎŞKUR ra vato aye îstîfa kerda û wina va: "Serê îtîraza mi ra rewşe amî sererastkerdiş. Eke ez bêveng bimendêne min meaş zî nêgirewtêne. A roje ra nata semedo ke mi stres kerd ez problemê weşî cuyena. Îdareyê nêweşxane va ‘ti bi diganeya to derbeyê pîl da ma ro, tu kesêke acîl de xebityayne, ti senîn digane manena.' La ez vernîye nê nêheqî vera nêdana. Wazenê cinîyan bi no hawa hepsê keyeyî bikerê. Ez do heqê xo bigeyrî. Veng dana heme cinîyan ke pîya têkoşîn bikerê."

 

Heto bîn ra zî Parlamentera HDPî yê Edeneyî Meral Daniş Beştaşe zî derheqê babete de pêşnûmepers da Serekîya TBMMî.