Safiye Alagaş

 

AMED - Sîsê Bîngole 80 serrî Hepisxaneyê Tarsusî de ya, JIN NEWSî rê nameyêke eşrawite. Sîsê wina va: “Mi domanê xo verdayne û şiwantî kerdêne. Mi kerran bar kerdêne. Mi 10 domanê bi şiwantî pîl kerdî. Mi mêrdeyê xo dir seba ke debara xo bikerî eynî kede dayne. Yê emrê mi de yê xeylêyan verê mi koç kerdî û şî. Mêrdeyê mi zî koç kerd û şi. Mi rê dej û elemê na dinya mend."

 

Sîsê Bîngole 80 serrî ke heposxaneyê Tîpê T yê Tarsusî de manena, rewşa weşîya aye her ke şino zêde beno. Sîsê nameyêke ajansê ma rê eşrawit û çîyê ke cuyaya qalî kerde. Sîsêya ke wendiş û nuştişê aye çin o, nameyê xo bi embazêke koxuşe aye de bi ziwanê zazakî da nuştiş. Sîsê dîyar kerde ke nasname de 70 serre eysena la qij ameya nuştiş û emrê aye rast 80 yo.

 

'Ez nêeşkena ranza ra bikoy cor' 

 

Sîsê da zanayîş ke bi serrêke hepisxane de ya û hema do di serrî zî hepisxane de bimano û va: "Nêweşîyê tansîyon û qelbî ya. Heto bîn ra çokê mi dejenê û dejê înan zêde yo. Goşê mi nêeşnawenê, çimê êdî nêvînenê. Semedê pîrbîyayîşî ez nêeşkena destawe xo zî bigîrî. Didanê mi zî taxim ê. A roje didanê mi destê mi ra kewtî û şikyayî. Ez bi desan rey şîya nêweşxane. Tewr peynî ewro didanê mi resayî destê mi. Heta diranê mi ameyî ez vêşan menda. Bi aşmêke û nîm o ez pêroyîyê roje warî de serê kursî de nişnena ro. Semedo ke ez her wext şina lavabo û ez nêeşkena nordane ranza bixebitnî şîrî warî û bêrî cor."

 

'Wexto ke ez şina nêweşxane ez zaf zehmetî ancena'

 

Dayîka Sîsê da zanayîş ke seba tansîyon û nêweşîya qelbî zî ganî werê cîya biewro û wina dewam kerde: "Ez mecbura ke werdê tîya borî. Reyke tansîyona mi vejya 20ine. Mi her wext wedarnenê acîlan. Nika tansîyona mi hîna baş a. Ez nêwazena şîrî nêweşxane. Xora ez di sanîye eşkena serê lingan de vinderî. Heta ez rîngî rêespar bena û şina verê doktorî probleman ciwîyena."

 

'Ez nêeşkena derdê xo doktor ra vajî'

 

Sîsê dewamê nameyê xo de nê çî vatî: "Ez tirkî nêzena. Ziwanê mi lehçeya zazakî yo. No semed ra ez nêeşkena derdê xo vajî. Doktor zî gorey rewşe derman dano mi û mi eşraweno. Ez êdî nêzana kam ci dermanî bixebitnî. Heto bîn ra ez kezebe ra kixena. Hema sebebê nêweşîya mi nêame zanayîş.  Ez kuxike ra nêeşkena şan de rakoyî. Şit, nane, lîmon fêde nêkenê. Engîşte linge ra bigî heta sereyê mi dejenê. Tepiştişê ewil de hîrê aşman hepisxane de ez menda. Hîrê rey ez şîya Tipê Edlî. Wexto ke ez ewil şîya Tipê Edlî raporê ‘nêeşkena hepisxane de bimano' dayî û ez tahliye bîya. La dimayê ceza dayî ez di rey şîya Tipê Edlî. Tipê Edlî raporê ‘eşkena hepisxane de bimano' da. Xora çîyê ke ma wextê surgun de cuyayî şima zî zanê."

 

'Qedere mi xirab a' 

 

Sîsê seba çîyê ke cuyaya va 'çîyê ke ez cuyaya qederêke xirab bî' û wina peynî nameyê xo arde: "Mi qehrê 10 doman û cuya dewe ant. Dima ra zî ez ameya tîya. Dejê mi qetî nêqedîyayî. Mi domanê xo verdayne û şiwantî kerdêne. Mi kerra bar kerdêne. Mi 10 domanê xo bi şiwanî pîl kerdî. Mi bi mêrdeyê xo dir debare xo kerdêne. Yê ke emrê mi de yê xeylêyan verê mi koç kerdî û şî. Mêrdeyê mi zî koç kerd û şi. Mi rê zî kahr û dejê na dinya mend. Omîdê mi o yo ke şer biqedîyo û merdişî nêvirazîyê."