Ronida Haci

 

TIL TEMIR – Netîceyê hêrişê dewleta tirk û çeteyê girêdayeyê ci de bi hezar efrînijî ca û warê xo ra koçî kerdî û verê xo dayî cayê ewleyan. Cinîyê ke dewa Til Neserîye de bi ca bîyî, dîyar kerdî ke hetê ewleyî de problemê înan çin o û wina vatî: “Hêrişanê dewleta tirkî ra ver, Efrîn cayêk ewle bî û cuya seyyewbînanî ewja de estbî. Labelê nika ma ca û warê xo ra bîyî û dest ronîyeno malê ma ser de.”

 

Netîceyê hêrişê dewleta tirk û çeteyê girêdayeyê ci de bi hezar efrînijî ca û warê xo ra koçî kerdî û verê xo dayî cayê ewleyan. Babete ser o cinîyê ke dewa Til Neserîye de bi ca bîyî qisey kerdî û dîyar kerdî ke hêrişanê dewleta tirk û çeteyê girêdayeyê ci ra ver Efrînî de sîstemê demokratîk û cuya seyyewbînanî estbî. Heto bîn de zî hetê ewleyî de problemê înan çin bî.

 

Cinîyan ra Gulnaz Ehmede ke bîya şahidê xeylê dejan qiseykerdişê xo de wina va: “Her çend ke zor û zehmetî bibî zî, ma xo ver da. Hêrişanê dewleta tirkî ra ver Efrînî de cuyêka asan û ewle est bî. Labelê hêrişan ra dima xeylê kesî cuya xo vînî kerdî. Bawerîya ma bi hêzê YPG-YPJyî estbî. Ma do Efrînî dagirkeran rê rizgar bikerî.”

 

'Ma sere nêrona û ma heta peynî xover da’

 

Elîfa Reşoye daye zanayîş ke dewleta tirkî do hêrişan rê netîce nêgîra û wina dewam kerde: “Hêzê mîyanneteweyî ke piştî dayî dewleta tirkî, eynî wext de sîstemê seyyewbînanî û demokratîke hedef girewtî. Netîceyê hêrişan de xeylê sîvîlî cuya xo vînî kerdî û birîndar bîyî. Şar heta peynî xover da û erdê xo nêterikna. Ma sere nêrona û ma heta peynî xover da. Omidê ma esto û ma do Efrînî dagirkeran rê rizgar bikerî.”

 

'Xoverdayîşê efrînijan dewam keno’

 

Tewr peynî cinîya binameyê Fîdan Reşoye qisey kerde û wina va: “Ma seba pawitişê domananê xo Til Temîrî ra koç kerdî. Ma Efrînî de bîyî şahidê qetlîamê sîvîlan. Hêrişanê dewleta tirkî de kuçe, keye, rayir û derguşeyan de doman û sîvîlî ameyî qetilkerdiş. Seba ke domanê mi nêbî qurbanê tanq û topanê dewleta tirkî, ma mecburî koçî kerdî. Ma sere nêronenî û ma do heta peynî têkoşîn bidî.”