Ronida Hacî 

 

HESEKÊ - Êzidî xeylê reyan bi qirkerdişê pîl dir rî bi rî mendê. Tewr peynî kewtişê DAÎŞî mîyanê Şengalî bi sebebê qirkerdiş û koçêke pîl. Cinîya Êzidî Selam Hena derheqê qirkerdiş, talan, koçberî û helnayîşê ke bi serran o serê înan de yeno ferzkerdiş ard ziwan ke pêwa heme tedayan fek herre û welatê xo ra vera nêdanê û hemverê polîtîkayê qirkerdiş û çinkerdişî sere wedarnayî.

 

Êzidî xeylê reyan bi qirkerdişê pîl rî bi rî mendê. Tewr peynî dekewtişê DAÎŞî yê Şengalî bi sebebê qirkerdiş û koçêke pîl. Cinîya Êzidî derheqê qirkerdiş, talan, koçberî û helnayîşê ke bi serran o serê înan de yeno ferzkerdiş ard ziwan ke ê hemverê polîtîkayê qirkerdiş û çinkerdişî têkoşîn kenê.

 

'Hemverê polîtîkayê qirkerdişê cinîyê Êzidî xo ver danê

 

Selam Henaya 48 serrî dîyar kerde ke aye sey cinîyê Êzidî hemverê polîtîkayê qirkerdiş û çinkerdişî xo ver danê û wina va: "Bi serran o ke ferman û koçberî serê ma de yeno ferzkerdiş. Her wext ma bi qirkerdişê pîl dir rî bi rî mendê. Tewr peynî DAÎŞî bi hezaran cinîyê Êzidî remnay, bazaran de rotî û îşkence bi înan kerdî. Tîya de dewleta tirkî zî bî sebeb ke Êzidî bi çinbîyayîş û qirkerdişê pîl dir rî bi rî bimanê. Cinîyê Êzidî hemverê nê çî xo pawitî, xo bi rêxistin kerdî sere nêtewênay. Nika ra tepya zî rêxistinbîyayîş hîna zêde bibo û ma nêverdenê reyke bîn cinîyê Êzidî bazaran de bêrê rotiş û bi tecawiz dir rî bi rî bimanê." 

 

'Cinîyê Êzidî pawitişê herre û nasnameyê xo kenê'

 

Selame ard ziwan ke bi xêrê Şorişê Rojawanî ê têkoşînê xo girs kerdê û wina va: "Dimayê Şorişê Rojawanî ma xo nas kerd û ma têkoşînê xo hîna girs kerd. Ma hîna zaf wayîrê herre xo vejyayî. Verê Şorişê Rojawanî rejîmî destûr nedayne ke ma keyeyê Êzidiyan awan bikerê. La dimayê ke şoriş ame kerdiş, êdî ma xo bi hawayêke azad eşkayne bîyarê ziwan û ma eşkayne dewaya doze xo bikerê. Bi awankerdişê rêxistinê YJŞî zî bi hezaran cinîyê Êzidî hemverê polîtîkayê qirkerdiş û çinkerdişî xo bi rêxistin kerdî. Rêxistin do bi pawitiş xurtir û girstir bo."

 

'Hemverê koçberî û helnayîşî ma xo pawit'

 

Selame ard ziwan ke ê pawitişê xo hemverê koçberî û helnayîşî dewam kenê û wina va: "Ewro polîtîkayê xeylê lêşîn serê Êzidiyan bi taybet zî serê cinîyan yeno meşnayîş. Nê polîtîkayî rayîrê koçberî û helnayîşî akeno. Ez veng dana heme Êzidiyan ke hemverê polîtîkayê koçberî, qirkerdiş û helnayîşî ra ageyrê warê xo û wayîrê tarîx û kulturê xo vejyê."