AMED - Cinîyê Amedî hêrişê dewleta tirkî û komê girêdayê serê Efrînî ke roja 58an de dewam kenê şermezar kerdî û vatî ke eynî hêrişê înan zî dîyê û nêwazê ke şarê Efrînî zî eynî çîyan biciwîyê. No semed ra veng dayî ke şar wirzo serê lingan û hêrişan ra vajê nê.

 

Hêrişê dewlata tirkî û komê girêdayê tirkîya serê Efrînî roja 58ine de dewam kenê û xoverdayîşê şarî hemverê hêrişan zî dewam o. Cinîyê Amedî ke hêrişan şermezar kerdî û vatî ke eynî hêrişê înan zî ameyî kerdiş û vatî ke ê nêwazenê şarê Efrînî eynî dejê biciwîyê û vengdayîşê wayîrvejyayîşê Efrînî kerdî.

 

Cinîya bi nameyê Huzna Fidane sere de şerê ke Efrînî kerdî şermezar kerdî û va ke dewleta tirkî çiqas hêrişê înan bikero û înan bikişo zî ê kurd ê û nasnameyê înan nînê vurnayîş û wina va: "Ma Apocî yê û ma kurd ê. Ma do heta peynî zî wina bê. Dewleta tirkî ewro hêrişê Efrînî kenê û bi seyan kesî kiştî û hema bi seyan kesî zî bi merdişî dir rî bi rî mendê. Erdogan çi şarê Kurdan ra wazeno? Hende gonîya şarê Kurd werd hema zî mird nêbîyo. Ma êdî nêwazenê ke domanê ma bêrê kiştiş. Wa êdî peynî nê hêrişan bêro û hêrişê serê Efrînî ganî peynî bê. Ma wazenê dişminî hemverê Kurdan peynî bibo."

 

'Ma xeylê çî dî û ma do qetî xo vîr ra nêkerê'

 

Cinîya bi nameyê Rukîye Tarhana ke xoverdayîşê şerê Sûrî de Sûr de mendêne û şahidîyê o wextî kerdo hêrişê serê Efrînî bi şîdet şermezar kerd û wina va: "Verê hîrê serran wextê Sûrî de şer virazya, ma bi çimanê xo ê kesê ke ameyî kiştiş û hetêke bîn ra xoverdayîşêke ameyne dayîş. O wext ma mecbur mendî ke Sûr ra vejyê. Ma xeylê çî dî û ma do qetî xo vîr ra nêkerê. Dewleta tirkî ma rê bîyê dişmin, ê çi ma ra wazenê. Dimayê xoverdayîşê Sûrî nika zî Efrîn de bi mîlyonan kesî xo ver danê û fek xoverdayîşê xo vera nêdanê. Çîyo ke ewro Efrîn ciwîyeno ma xeylê baş fam kenê. Semedo ke ma zî eynî çî ciwîyeynê. Ganî ewro zî ma do bêbê vengê xoverdayîşî. Semedo ke ma nêwazenê êdî kurdî bêrê kiştiş. Senîn şerê Sûrîye bi xoverdayîşê şarê kurd bi ser kewtê hêrişê Efrînî zî bi xoverdayîşê şarê kurd biqedênê û biresê azadîya xo."

 

'Eke veng nêvejo do uca de qirkerdiş virazyo'

 

Şukran Akdemîre zî ard ziwan ke êdî nêwazenê televîzyon temaşe bikerê û wina va: "Semedo ke wexto ke ma televîzyon temaşe kenê ke kurdî yenê kiştiş. Ma êdî nêwazenê ke şer û pêrodayîş virazyê, nêwazenê ke şarê kurd bêrê kiştiş û herra xo ra bêrê dûrvistiş. Ma wazenê ke demêke nêzîk de seba Efrîn de veng bêro vetiş. Eke veng nêvejêyo uca de qirkerdiş virazyo. Semedê hêrişê ser  Efrînî bêrê vindertiş, ganî heme kurd vejyê serê lingan. Wa heme kurd şarê Efrînî dir hetkarî bikerê."

 

'Bi serran o ma kurdî yenê kiştiş'

 

Tewr peynî zî bi nameyê Roza Çetîne hêrişê  dewleta tirkî yê serê Efrînî yenê kerdiş şermazer kerde û wina va: "Nê hêrişê ke Efrîn de yenê kerdiş wehşet o. Bi serran o ma kurdî yenê kiştiş û hemverê ma kurdan qirkerdiş yeno kerdiş. Êdî ma kurdan ra çi wazenê? Hende gonîya ma werdî hema mird nêbîyê. Ma do a roje ra nata çi destê ma ra bêro ma do bikerê. Eke ma bêveng bêmanê, yeno na manayê ke ma zî hemkarê qirkerdişî yê. No semed ra zî vengê mi heme şarê kurd esto ke wirzê serê lingan."