ENQERE - Nuştox Hamîde Yîgîte dîyar kerde ke hêzê mîyanneteweyî vera hêrişê dewleta tirkî de bêveng î û wina va: “Seba adirbestî îqazkerdişêk cîddî nîno kerdiş. Efrînî de qirkerdişê merdimîye yeno kerdiş. Rusya seba ke Tirkîyayî hetê xo de bigîra, cîhadîstan rê ca akerda”

 

Artêşa tirk û çeteyanê ci 20ê Çeleyî de bi tanq, top û teyarayan dest bi hêrişê Efrînî kerdbî û hêrişî roja 54. de bêmabên dewam kenî. Cayê sîvîlan hewa û bejayî ra yenî hedefgirewtiş û heta nika bi seyan sîvîlî ameyî qetilkerdiş. Her roje bajar yeno bombekerdiş û heta nika 250ra zêde sîvîlî merdî û 700 ra zêde sîvîlî zî birîndar bîyî. Her çend ke qerarê adirbestî yê Konseyê Ewleyîya Neteweya Yewbîyaye (BMGK) bibo zî Tirkîya hêrişê xo dewam kena. Tirkîya xetê aw, cereyan û resnayîşê bajarî zî texrîb kena. Babete ser o Pisporê Rojhelato Mîyanên Nuştox Hamîde Yîgîte qisey kerde û qiseykerdişê xo de bale ante hêrişê dewleta tirk û çeteyanê girêdayeyê ci.

 

'Bêvengîyêk cîddî esto'

 

Hamîde destpêkê qiseykerdişê xo de dîyar kerde ke hêzê mîyanneteweyî vera hêrişê dewleta tirk û çeteyanê girêdayeyê ci de bêvengî û wina dewam kerde: “Derheqê adirbestî de Tirkîya nîna îqazkerdiş. Bêvengîyêk cîddî esto. Nê seba welatê rojawan vana. Ewja de wirdî hetî zî bi hawayo balkêş kayî kenî. Rusya seba ke Tirkîyayî hetê xo de bigîra, cîhadîstan rê ca akerda.”

 

'Îqazkerdişêk cîddî çin o'

 

Hamîde dewamê qiseykerdişê xo de wina va: “Rusya zî sey Tirkîya kena. Nika hetê merkezê bajarî şonê. Heme hemwelatîyê dewan koçê merkezê Efrînî kerdî û ewja de hûmara hemwelatîyan zêde bîya. Merkezê Efrînî de tehlukeyek cîddî esto. Şar qetlîamî reyde rî bi rî yo. Vera qetlîam û qirkerdişî de bêvengîyêk pîl esto. Sivîl yenê etilkerdiş. Tena Heyva Sor yê Surîyeyî, NYyî reyde mîyanê têkilî de yo û piştîyê merdimîye resneno şaran. Vîşêrê Heyva Sor sewbîna piştî nêresenî şaran. Heqê îqazkerdişê Tirkîya de tu gamî nînê eştiş. Beno ke Tirkîya û çeteyê girêdayeyê aye, qirkerdişêk pîl yê merdimîye pê bîarî. Tehlukeyê qetlîaman esto. Çimkî şonê hetê merkezê bajarî. Ma fikirîyenê, gelo hêzê mîyanneteweyî çi planan kenî û wazenê çi bikerî? Ganî seba adirbestî veng bêro kerdiş.”