MÊRDÎN - Celîle Îldenîze 8ê Adare de bi fotografê kênaya xo beşdarê mîtîngî bîye û dîyar kerde ke kênaya aye bi seran rastê şîddetê mêrdeyê xo amey û dima ra amey vatiş ke kênaya mi ‘xo kişta.’

 

Kênaya Celîle Îldenîza 60 serrî vîndîbîyayeya û seba kênaya xo edalet gêrena. Celîle 8ê Adare de bi fotografê kênaya xo beşdarê mîtîngî bîye û dîyar kerde ke kênaya aye bi seran rastê şîddetê mêrdeyê xo amey û dima ra amey vatiş ke kênaya mi ‘xo kişta.'

 

‘Mêrdeyê aye îşkence bi aye û domananê aye kerdêne’

 

Celîle Îldenîza ke fotografê kênaya xo girewta xo dest, qiseykerdişê xo de wina va: “Kênaya mi amey qetilkerdiş û kesêk daxî ceza nêgirewte. Nameyê kênaya mi Sultan Ertaşe ya û 32 serrî bî. 6ê gulane de amey vatiş ke kênaya mi ‘xo kişta’ û wedarnayî nêweşxane. Mêrdeyê Sultane verê cu zî zewecîya bî û 4 domanê ci est bî. Kênaya mi zaf ciwan bî û dewa Heşşe ya Wêranşarî de mendêne. Kênaya mi zewacê xo de rojêk weş nêdîye. Her roje şîddet vînayêne. Tena mêrdeyê aye teda nêkerdêne, domanê mêrdeyê aye zî kênaya mi kutêne û îşkence kerdêne. Mi kênaya xo rê vatêne bê. Labelê kênaya mi vatêne ‘ez do xover bida.’ Ma 6ê gulane de qisey kerdî û roja bîn saet 05.00î de lajê mêrdeyê aye telefon kerd û va; kênaya şima jehr werd a.”

 

‘Wa qatil bêrî dîyiş’

 

Celîleye qiseykerdişê xo yê peyênan de wina va: “Ez bawer nêkena ke kênaya mi xo bikişa. Kênaya mi bi seran xover daye û seba domananê xo heme çîyan kerdêne. Cenazeya kênaya mi seba otopsî erşawitî Amed. Rapora otopsîyî nîşanê ma nêdayî. Ez baş zana ke şîddet ver kênaya mi merd a. Beno ke bêra qetilkerdiş zî. Cenazeya aye nêdayî mi û berdî dewa xo. Ez seba kênaya xo edalet wazena. Eke lazim bibo, ez do şêra Anqara. Wa qatilê kênaya mi bêrî dîyîş û muhakemekerdiş.”