Rojda Aydin

 

AMED - Rojnamegerê cinî derheqê JIN TV ke ewro dest bi weşna kena, şîrove kerdî û dîyar kerdî ke ganî heme cinî JIN TV taqîb bikerê û ewynî wextî de bi JIN TV dir têkoşînê cinîyan gamêke bîn aver şêro.

 

JIN TV ya ke Weqfê Newa Jin her merheleyê akerdişê aye de ca girewte, do ewro dest bi weşênayîşî bikera û cinî zî bi kelecanêke pîl akerdişê televîzyonî pawenê. Televîzyono ke sergerra qetilkerdişê hîrê sîyasetmedarê Kurdî ke Parîs de ameyî qetilkerdiş de ame îlankerdiş, ewro do dest bê weşan bikero.

 

'Serkewtişê cinîyan o'

 

Rojnamegeran ra seba JIN  TV piştdayîş ame dayîş. Etîdora Gazete Şûjine ke bi KHK amî padayîş, Munevver Karademîr derheqê JIN TV de ewnîyayîşê xo ardî ziwan û wina va: "Cinî bi serran o hemverê serdestîye camêrdan ke çapemenî de alternatîfê xo awan bikerê têkoşîn kerdêne. JIN TV zî nîşaneyê serkewtişê no têkoşînî ya. Warê çapemenîye warê camêrdan yena vînayîş. La bi têkoşînê cinîyan no ameyo şiktiş."

 

Munevvere yewin rejîsora pêroyîya cinîyan a Tirkîya Gurbetelî Ersoze arde vîr û dîyar kerde ke prosesêke tedayê pîl ser çapemenîye bî, Gurbetelî hemverê zulmî sere wedarnaya û xebata çapemenî de bîya nameyê israr û bawerî.

 

'JIN TV do bibo vengê cinîyan'

 

Munevvere dewamê qiseykerdişê xo de cinîyê merheleya awankerdişê televîzyonî de ca girewtê zî pîroz kerde û wina va: "Televîzyon de do bername û pêşkêşkerdiş bêrê kerdiş la ez nêwazena tena bi nê sînor bimanê. Cinî parçeyêke girîng ê komelî yê û camêrdî destûr nêdanê cinî boye xo bidê. Her gamêke newe ê cinîyan xoverdayîşêke newe hewinenê. No semed ra zî ganî cuyayîşê cinîyan, hîkayeyê cuya cinîyan bibê meymanê keyeyê ma. Ganî belgefîlm û fîlm zî ca bigîrê. Ez bawer a do JIN TV biba vengê cinîyan."

 

'Hewl danê vengê cinîyan bibirnê'

 

Muxabira Rojnameya Evrenselî Serpîl Berke dîyar kerde ke televîzyonê cinîyan hetê prosesê de xeylê manayîn a û wina va: "Hewl yeno dayîş ke her warî de vengê cinîyan bêro birnayîş. Bi qeyûman xebatê cinîyan rastê tedayan ameyî, sazgehî ameyî girewtiş. Bi OHAL û KHKyan hemverê televîzyon û rojnameyan hêrîşê cidî yenê kerdiş. Ez bawer kena ke do JIN  TV têkoşînê cinîyan gamêke aver bero.

 

'JIN TV ez a, ma yê'

 

Edîtora Ajansa Xebaran a Mezopotamya (MA) Zuhal Atlane va wexto zanayîşê JIN TV eşnawito vato ke lazim o aye zî sey rojnamegerêke piştdayîş bido û wina va: "JIN TV netîceyê têkoşînê cinîyan ê bi serran o. JIN TV ez a, ma yê. Ganî tarîx û rastîye cinîyan zî însafê camêrdan rê nêro verdiş û ganî cinî bixo binusnê. Ez wina bawer kena ke JIN TV zî do bibo wesîle. Hemverê televîzyonê camêrdan ke cinîyan her wext qij fînenê, do bernameyê ruhê xoverdayîşê yê cinîyan vejêno vernî weşan bikerê. Do JIN TV piştdayîşêke pîl bido cinîyan û serkewtişêke pîl o."