TIRBESPIYÊ - Cinîyê Tipbespiyî 8ê Adare Roja Cinîyanê Kedkaran yê Dinya yê heme cinîyanê dinya pîroz kerdî û dîyar kerdî ke 8ê Adare bi xoverdayîşê Efrînî tacedar bikerî û wina vatî: “Çinkerdişê reng û têkoşînê cinîyan yê bi serran yeno waştiş.”

 

8ê Adare Roja Cinîyanê Kedkaran yê Dinya heme welat û cayê dinya de yeno pîrozkerdiş. Cayê kete de şerê azadîye virazîyayî û têkoşîn ameyî dayîş de zî pîrozkerdiş vîrazîyenî. Nê cayan ra yew zî Tirbesipî yo. Cinîyê Tirbespiyî 8ê Adare yê şarê Efrîn, Rojawan û heme cinîyan pîroz kerdî.

 

Babete ser o cinîyan ra Amed Hacî, Meha Reşo û Gulçîn Osmane qisey kerdî û bale antî pîrozkerdişê 8ê Adare Roja Cinîyanê Kedkaran yê Dinya ser.

 

Cinî nîşaneya cuya seyyewbînanî û demokratîke yî

 

Amed Hacîye qiseykerdişê xo de wina va: “Cinî nîşaneya cuya seyyewbînanî û demokratîke yî. Cinîyê dinyaye bi serran o ke seba girewtişê heqê xo û wayîrvejîyayîşê erjê xo, xover danî. Cinîyî sibarojê ma roşne kenî. Cinîyî Efrînî de seba roşkerdişê sibarojî têkoşîn danî meşnayîş. Cinîyê Efrîn û dinya do 8ê Adare Roja Cinîyanê Kedkaran yê Dinya de mesajê serkewtişî bidî. Bi ruhê Avesta Xabûrane ma do vera kesê ke azadîya cinîyan nêwazenî de bivinderî."

 

Kesêk nêeşkeno îradeyê cinîyan bişikno

 

Meha Reşoye qiseykerdişê xo de wina va: “Cinîyî wayîrê îradeyêko pîl î. Kesêk nêeşkeno îradeyê cinîyan bişikno. Ma bi fikir û fehmê Rayber Apoyî resayî azadîya xo. Cok ra kesêk nêeşkeno îradeyê ma bişikno. Ma do heta peynî xover bidî û heqê xo bipawî. Serkewtiş yê heme cinîyanê Efrînî yo. Ma do 8ê Adare bi xoverdayîşî tacedar bikerî.”

 

8ê Adare do biba serkewtişê Efrînî

 

Gulçîn Osmane qiseykerdişê xo de 8ê Adare yê heme cinîyan pîroz kerde û wina va: “Ez omid kena ke 8ê Adare biba serra omid, serkewtiş û azadîya Efrînî. Cinîyê Efrînî do 8ê Adare de xover bidî. Serkewtiş yê Efrînî yo.”