AMED - Cinîyê ke, Kooperatîfê Cinîyan ê Baglarî de xebityayne, berardişê xo tena Kurdistan de nêroşenê. Cilê neteweyî îxracê Amerîka, Îtalya û xeylê welatî bînan kenê. Cinîyan dîyar kerde ke krîzêke ekonomîya pîl yena cuyayîş û vengdayî cinîyê seba heqê xo bigîrê gerek vejyê warê 8ê Adare. 

 

Vahîde Kaya û embazê xo yê Kooperatîfê Cinîyan ê Baglarî cilê neteweyî viraznenê, dayî zanayîş ke ê seba krîzê ekonomî zehmetîyan ancenê û krîzêke pîl yeno cuyayîş. Vahîdeya ke serra 2013 ra heta nika kooperatîf de xebityena da zanayîş ke wexto ke newe dest pêkerdê zêde cil derznayê û çend serrî wina derbaz kerdê. Vahîde qiseykerdişê xo wina dewam kerde: "Dima ra nê cilî sey cilê rojane ameyî xoradnayîş. Cinîyan eleqeyêke pîl mojnayî qumaşê verê, motîfê verê dayî. Ma zî motîf û modelê cîya berardiş kerdî. Ma bi kumaşê ke kulturê Kurd temsîl kerdêne cilî derznayî. Ma waşt bi no hawa kulturê Kurd dewam bikerê. Bi 4 serrî yo cilê otantîk derznenê. Verê ci de ma cilê mintiqa zî derznenê."

 

'Ma kedêke pîl danê'

 

Vahîde dewamê qiseykerdişê xo de da zanayîş ke ê hîrê kesî bîyê û çalak xebityen û wina va: "Ma serê înternetî de seba Stenbol, Enqere, Mersîn û xeylê bajarê bînan cilan roşenê. Bi projeyê cîya ma berardişan roşenê teber zî. Ma eşrawenê Amerîka û Îtalya zî. Wexto ke bajar û welatê cîya wazenê ma zaf kêfweş benê. Semedo ke motîfê Kurd û rengê Kurd bale merdiman ancenê."

 

'Ma do 8ê Adare bi coş pêşwazî bikerê'

 

Vahîde bale ante serê 8ê Adare û ard ziwan ke her serre bi ameyîşê 8ê Adare karê înan zaf zêde beno la emsar semedê krîzê ekonomî zehmetîyan ancenê û wina va: "Krîz esto merdimî tersenê pere xerc bikerê. Lazimîyê merdiman zêde yo. La pereyê ke ê gênê qîm nêkeno. Çiqas vajê krîz çin o ma esnaf ê. Ma vînenê hemwelatî çiqas zehmetî ancenê. La pêwa heme çî ma do bi coşêke pîl 8ê Adare pîroz bikerê û hemverê mêtîngerîyê keda cinîyan waran de bê. Ma veng danê heme cinîyan ke waran de cayê xo bigîrê."