ÊLIH - Seba projeya Awbendê Ilisûyê sûka tarîxî ya Heskîfî bêro vengkerdiş esnafê sûke rê teblîgat ame eşrawitiş.

 

Hewldayîşê Ciwîyayîşê Heskîfî, derheqê Awbendê Ilisu de ke ame temamkerdiş îzahat dayî. Îzahato ke ame dayîş de ame dîyarkerdiş dimayê projeyê awbendê Ilisuyî û HESî bêro temamkerdiş do sera 90ê qezaya Heskîfî awbendî ra negatîf bandure bibê. Û ame dîyarkerdiş ke do 199 warê ciwîyayîşî yê mintiqa zî binê awe de bimanê.

 

Îzahat de ame dîyarkerdiş ke yeno waştiş mintiqa bê merdim bêro verdayîş û îhlalkerdişê heqan zî dewam keno. Îzahat de bale ancîya serê suka tarîxî ya Heskîfî û wina ame vatiş: "22yê sibate de esnafê sûke ra teblîgat ameyo eşrawitiş û ameyo waştiş ke sûke bêro vengkerdiş. Esnafê ke verê viraştişê awbendî hûmara înan nêzdîyê 200 bi nika hûmara înan xeylê kêm bîya û ameyê merhelaya ke derabeyê dikanê xo bigîrê. Teblîgato ke 25 esnafê sûke mendê ameyo eşrawitiş de yeno dîyarkerdiş ke ganî 15 rojan de dikan bêrê vengkerdiş. Eynî wextî de teblîgat de yeno vatiş ke kesê ke dikanê xo veng nêkerê û dikanê înan do bêro desteserkerdiş."

 

Îzahato ke ame vatiş projeyê awbendê Ilisuyî projeyê rant, koçberkerdiş û bêmerdim verdişê mintiqa yo û wina ame vatiş: "Ma verê no zî na babete pare kerdib û bale antib serê tehlukeyê proje. Eke proje bêro temamkerdiş û awbend biko merîyet zî ma do xoverdayîşê xo dewam bikerê. Ma do nêverdê no proje biko merîyet."