STENBOL - Endamê Meclîsê Cinîyan ê Stenbolî ke seba 8ê Adare xo amade kenê, vejênê kuçeyan û vanê: "Ma do vengê cinîyê ke ameyê kiştiş, vengê domanê ke ameyê îstîsmarkerdiş kuçeyan de biqîrê. Ma nêvindenê û ma do nêvinderê zî. Ma veng danê heme cinîyan ke beşdarê 8ê Adare bibê."

 

Pawitoxê heqê cinîyan yê Stenbolî, bi munesebetê 8ê Adare Roja Cinîyê Kedkar ê Dinya vengdayîş kerdî. Endamê Meclîsê Cinîyan ê Stenbolî bi rojevê ‘îstîsmarê domanan' û ‘8ê Adare Roja cinîyan' ameyî têhet û mesajê 8ê Adare bi hemkarîya ajansê ma qalî kerdî. Meclîsê Cinîyan ra Fîdan Ataselîme dîyar kerde ke ê sey her serre emsar zî do kuçeyan de bê û wina va: "Proseso ke îhlalkerdişê heqan tewr zêde yeno cuyayîş de ma cinî sey 25ê Teşrîna Peyêne ma do 8ê Adare de zî kuçeyan de bê. Ma do bibê vengê cinîyê ke ameyê kiştiş, vengê domanê ke rastê îstîsmarî ameyî biqîrê." Fîdane veng da heme cinîyan 8ê Adare de vejyê kuçeyan û va, "Ê nêvindenê û do nêvinderê."

 

'Teda esta ro xoverdayîş zî esto'

 

Aşkin Koçe zî ard ziwan ke aye sey Meclîsê Cinîyê Stenbolî 8ê Adare de do kuçeyan de bê û veng da heme cinîyan ke meclîsan de têkoşîn bimeşnê. Aşkine da zanayîş ke do emsar bi heybetêke pîl 8ê Adare pêşwazî bikerê û teda estbê, xoverdayîş zî esto.

 

'Ma do têkoşîn girs bikerê'

 

Dîlara Gevreke zî da zanayîş ke sey Dinya, Tirkîya de zî cinî game peyser nêerzenê û do têkoşîn dewam bikerê û wina va: "Ma nêvindenê. Ma do têkoşîn girs bikerê. Ma do 8ê Adare de kuçeyan de bê. Ma nika ra dest bi amadekarîyan kerdo. Ma slogan û pankartê xo amade kenê. Ma bi kelecan ê. Ma hêvî kenê ke heme cinî kuçeyan de bê."

 

Rojda Aslane ard ziwan ke ê bi cil û belgê azad, bi huyayîşê zêde wazenê cinîyan meydanan de bivînê û va seb acinî bieşkê dest camêrdan ra vera bidê, ciwîyayîş de bimanê, şîdetê serê cinîyan peynî bo, kiştoxê cinîyan cezaya giran bigîrê do warê 8ê Adare de bê.