Ronîda Hacî 

 

HESEKÊ - Şerwana YPJî Berçem Dilsoz û Endama Hêzê Asayişî Dîlan Şiblî dîyar kerdî ke bi ruhê xoverdayîşê Efrînî ê do 8ê Adare pêşwazî bikerê û têkoşînê xo dewam bikerê.

 

Şerwana YPJî Berçem Dilsoz û Endama Hêzê Asayîşî Dîlan Şiblî dîyar kerdî ke bi ruhê xoverdayîşê Efrînî ê do 8ê Adare pêşwazî bikerê û wina va: "Ma do koletî û tedayê serê cinîyan qebul nêkerê û ma do bi îradeyê xo yê azad zorê îqtîdaran berê."

 

'Ma merdiş ra nêtersenê'

 

Şerwana YPJî Berçem Dilsoze 8ê Adare Roja Cinîyê Kedkar ê Dinya destpêk de Cinîyê Kurd û heme cinîyê dinya rê pîroz kerde û va: "Ma merdiş û tank û topan ra nêtersenê. Ma do bi heme teda û zordarîyan hewl bidê ke 8ê Adare seba heme cinîyê dinya bibo xeleka çareserîyêke mende. Bi têkoşînê cinî şoreşêke ame awankerdiş. Cinîyê ke koletî qebûl nêkerdî û wiştî serê lingan. Gerek cinî her bi hêz û bi îradeyêke pîl hemverê îqtîdaran vejyê û herre û erjê xo yê pîroz wayîr vejyê."

 

'Seba pawitişê heqê cinîyan ez beşdarê hêzê YPJî bîya'

 

Berçeme bale ante serê felsefeyê Rayberê PKKî Abdullah Ocalan û wina dewam kerde: "Bi felsefe û fikrê Rayber Apo cinî bî wayîrê îradeyêke pîl. Gerek ma bi îradeyê xo yê xurt bi ruhê xoverdayîşê Efrînî waran veng nêverdê. Seba pawitişê heqê cinîyan ez beşdarê hêzê YPJ bîya. YPJ sîwana pawitişê îradeyê cinîyan bi rûmetî ya. Gerek ma seba pawitişê rûmetê xo 8ê Adare bi têkoşînêke bê hempa pêşwazî bikerê."

 

'Şorişê rojawanî şorişê cinîyan o'

 

Berçeme qiseykerdişê xo wina qedêna: "Şorişê Rojawanî, Şorişê Cinîyan o. Ganî bi ruhê Şorişê Rojawanî û bi ruhê xoverdayîşê Efrînî ma warê 8ê Adare pir bikerê û zîncîrê koletî bişiknê."

 

'Ganî cinî heme waran de vengê xo berz bikerê'

 

Endama Hêzê Asayîşî Dîlan Şiblî ard ziwan ke 8ê Adare roja têkoşînê cinîyan serberz a û wina dewam kerde: "Cinîyê Kurd û Cinîyê Dinya bi têkoşînê şiknayîşê zîhnîyetê camêrdan, 8ê Adare pêşwazî bikerê. Cinîyê ke dewaya heqê xo yê rewa kenê do vejyê waran û vengê xo berz bikerê û zîhnîyetê koletî ke ameyo ferzkerdiş bişiknê."

 

'Ganî seba aştî û azadî cinî mil bidê yewbînan'

 

Dîlane balê ant ser yewî û hêzê cinîyan û wina dewam kerde: "Seba şîdet û nêheqîyê ke cinîyan yeno kerdiş peynî bibo,ganî cinî bibê yew. Seba aştî û azadî gerek cinî mil bidê yewbînan."

 

'Arîn, Barîn û Avesta do rayîrê ma roşn bikerê'

 

Dîlane qiseykerdişê xo wina qedêna: "Ma do bi têkoşîn û bi feyzê Arîn, Baran û Avestayan hêvîyê xo geş, têkoşînê xo berz bikerê û hemverê neyaran sere nêtewênê. Arîn, Barîn û Avesta do rayîrê ma roşn bikerê. Do bi ruhê cinîyê têkoşer warê 8ê Adare açernê roşnê sibarojêke azad."