ÎZMÎR - Amadekarîyê 8ê Adare yê Platformê Cinîyan ê Îzmîrî lezgînî dewam keno û cinîyê Keyeyê Şarî Evrîm Çakire wina va: "Ma veng danê cinîyan ke seba pawitişê ciwîyayîşî û heqê xo 8ê Adare de vejyê waran."

 

Cinî hemverê şîdetê vera cinî û domanan, hemverê vatişê sîyasetmedaran û polîtîkayê şer do 8ê Adare de waran de bê. Pêkameyê Platformê Cinîyan ê Îzmîrî xebatê xo yê 8ê Adare dewam kenê. Cinî do şan de saete 19.00 de Alsancak Leman Kulturî de bêrê têhet û  heta Merkezê Kulturî Turkan Saylan rayşîyayîş bikerê. Kombîyayîşê Muzîkê Cumartesî û  Koma erbaneyî 2yîn Şubeyê Egîtîm Senî zî beşdarê çalakî bibê.

 

'Cinî kuçeyan de bî'

 

Endama Keyeyê Şarî Evrîm Çakire dîyar kerde ke bi OHALî dir ameyo waştiş ke muxalefet bêro bêvengkerdiş la cinî kuçeyan de vengê xo berz kerdî. Evrîme nê çî ardî ziwan: "Cinî vera fetwayê dîyanet kuçeyan de bî. Seba qanûnê îstîsmarê domanan meclîse ra derbaz nêbo, kuçeyan de bî. Pêwa heme astengî û qedexeyan do cinî 8ê Adare de kuçeyan de bê."

 

Evrîme ard ziwan ke eke qanûnî rast bêrê kerdiş eşkenê vernîye kiştişê cinîyan û îstîsmarê domanan bêro girewtiş û xeylê qanûnê ‘zîna’, ‘hadim’ yenê ferzkerdiş zî bi mezgê camêrdan yeno kerdiş û va: "Cinî do vengê serewedartişî berz bikerê. Wexto ke Karaman de 45 domanî rastê îstîsmaro zayendî ameyî,hukmatî va 'bi reyke çîyêk nêbeno' û bi no vatîşî zî vatî 'ma heme Ensar ê'."

 

'Serewedartişî cinîyan esto'

 

Evrîme peynîye qiseykerdişê xo de da zanayîş ke hukmat wazeno cinî bêveng bimanê, heqê xo nêgîrê û va: "Ma vanê cinî estê. Ma veng danê heme cinîyan ke seba welatêke aştîyane, têduşt û azadî cinî têhet bê û vejyê meydanê 8ê Adare."