MÊRDÎN - Koçerê Mêrdînî pêwa astengîyê OHALî amadekarîyê zozanan dewam kenê. Koçerî do hewteyê ameye de bikoy rayîrê Zozanê Faraşînî.

 

Zozanê Feraşînê yê hîrêgoşeyê Şirnex, Colemêrg û Wanî de yo, Mêrdînijî hamnanî tîya û aşmê zimistanî zî Koyê Bagokî de derbaz kenê û nika seba ke şêrê zozanan amadekarî kenê. Koçerê ke qedexeyê zozanan bi sebebê OHALî yenê astengkerdiş qedexeyan nas nêkenê û do hewteyê ameye de do bikoy rayîrê zozanan. Koçerê ke Bagok ra vejênê rayîrê Cizîre ra şênê Besta û uca ra şinê Zozanê Feraşînî. Koçeran dîyar kerdî ke ê qedexeyan nas nêkenê.

 

'Ma nêvejîyê zozanan do heywanî bimrê'

 

Aysel Baykale dîyar kerde ke serra vîyarte de leşkeran hewl dayê ke ê nêşêrê zozanan û va: "Ma xo ver da û ma heme koçerê mintiqaya Mêrdînî ameyî têhet û ma kewtî zozanan. Leşkeran nêeşkayî vernîya ma bigîrê. Ma do emsar zî wina bikerê. Ma nêvejîyê zozanan do heywanî bimrê.”

 

Aysele amadekarîyê xo zî wina va: "Ma heywan û hacetanê xo amade kenê. Ma seba raywanî zî çîyê xo amade kenê û vejênê rayîr. Semedo ke ma heta resenê zozanan hewte derbaz benê. Semedo ke emsar zimistanî wişk derbaz nêbi ma do rew vejyê. Gerek heywanî baş biçeryê. Dimayê ke karik û berxikê ma tay bibê pîl ma do ageyrê."

 

Aysele peynîye qiseykerdişê xo de ard ziwan û va  koçerî zehmet bo zî zaf weş o û da zanayîş cinî û xoza qetî yewbînan ra nêbenê.