WAN - Cinîyê bi nameyê H û G yê ke rastê îstîsmaro zayendî ameyî verdayîş û emrê qij de ameyî zewicnayîş do 8ê Adare de xoverdayîş de bê. Her di cibîyan veng da heme cinîyan kerdî ke 8ê Adare de hemverê şîdetê camêrdan vejyê meydanan.

 

Prosesê hêrişê hemverê cinîyan zêde bîyê, polîtîkayê şer û OHAL cuyayîş de serdest bîyê de cinî 8ê Adare pêşwazî kenê û cinî do reyna waran de bê. Her di cinî rastê rîyê xof yê zîhnîyetê camêrdam ameyî H û G seba 8ê Adare vengdayîşê têkoşînî kerdî.

 

G. ya ke hetê camêrdoke 20 serre aye ra pîl bi amî remnayîş û aye ard Wan. Camêrdo ke verê zewicnayebi, bi mehrayê dînî bi G dir zewecêno. G. ya 16 serrîya xo de rastê şîdetî amî qetî sere nêda ro û bi serran o têkoşîn kena. G ya rastê şîdetê fîzîkî û zayendî amî wina qalî kerde: "Ewil mi hewl da ez sere nêtewênî. La dimayê 4 domanê mi virazya dima dest û lingê min ameyî girêdayîş. Ez mecbur menda roşî. Ez 16 serrî bîya ameya remnayîş. Hema domane bîya. Mêrdeyê mi 20 serran mi pîlî ra bi. Emrê qij de mi nê çî dî. La mi seba domananê xo çîyêk nêkerd. Verê mi de nêmendêne. Şîne verê cinîya bîn. Wexto ke ameyne şîdet bi mi kerdêne. Mi gerre kerd, qerarê dûrvistişî da."

 

'Gerek heme cinî sere wedarnê' 

 

G ya rastê şîdetê ekonomî zî amî 17 serrî dima seba ke biewno domananê xo ra kargehêke akena, la reyna zî ê camêrdî ra xelas nêbena: "Mi reyan nêeşkayne kîrayê dikanê xo bidî. La mi çar doman dayne wendiş. Mêrdeyê mi ameyne  verê dikanî û pereyê mi waştêne, wexto ke mi nêdayne şîdet ro mi kerdêne. Ez wazena cuya mi seba heme cinîyan bibo nimûne. Merdim kam bera rê bido rastê şîdetî yeno. Ez tena nîya. Ez 8ê Adare de veng dana heme cinîyan kena ke têkoşîn bikerê."

 

Bi camêrdo ke ci rê îstîsmaro zayendî kerd zewicya

 

Cinîya bi nameyê H. ya ke dewa girêdayê Qelqelîya Wanî de rastê îstîsmarê camêrdo ke cîranê înan bi amî û dima ra ey dir amî zewicnayîş. H. ya netîceyê îstîsmaro zayendî de diganî manena çîyê ke ameyî sereyê aye wina va: "Camêrdo ke tecawizê mi kerd ame tepiştiş. Alozîyêke pîl ame cuyayîş. Dimayê di aşman dima ez musaya ke zewicnayîya. Keyeyî testê DNA kerd û mi ra bawer kerdî. Seba ke hedîse pîl nêbo, camêrdo ke tecawizî mi kerd zewicnayî. Dima ra ez hem rastê şîdetê camêrd û keyeyê ey ameya. Seba darbeya mi sereyê xo ra girewt, her çî rrw kena xo vîr. Reyan mi ra vanê 'gêj'". H. veng da heme cinîyan û va ke 8 Adare de têkoşîn bikerê.