Rojda Aydin

 

AMED - Endama Platformê Cinîyan ê Dîcleyî yê Amedî Serap Kiliçe qerarê beratî şermezar kerdî û va ke OHALî de şîdetê serê cinîyan xeylê zêde bîyo û cinî xeylê rastê şîdetî yenê.

 

Roniştişê 3in dewaya polîso bi nameyê B.K. ke hemverê cinîya bi nameyê M.B. rê Mêrdîn de îstîsmaro zayendî kerdib 8 Sibate de 1in Dadegeha Cezaya Giran ya Mêrdînî de amebî vînayîş û polîs B.K. yo hêrişkar amebi beraetkerdiş. Endama Platformê Cinîyan ê Dîcleyê Amedî ( DAKAP) Serap Kiliçe qerarê beraetî yê derheqê B.K. de ame dayîş şermezar kerde û ard ziwan ke dimayê OHALî îhlalkerdişê heqan xeylê zêde bîyo û tewr zêde cinî rastê şîdetî yenê.

 

Serape va ke di tewirî şîdetî ser cinîyan de estê. Nê tewirî ê yewin ra a ya ke wexto ke sîyasetmedarî, şîdeto ke yeno kerdiş rêze ra û normal bivînê şîdet serê cinîyan de zêde beno û wina: "Tewir ê diyîn zî nêcaardişê huqûqî yo. Eke dadgehan de heqê cinîyan nêro pawitiş, qanûn zî cinîyan nêpawo û eke dewayan de tena camêrdî bêrê pawitiş no zî yeno na mana ke heqê cinîyan ke ameyo girewtiş zî destê înan ra yeno girewtiş. Îqtîdaro ke şîdetê cinîyan normal bivîno, do hişmendîyê xo yê çewt zî mîyanê komelî de vila bikero. No semed ra ma vanê ke qetilkerdişê cinîyan û her tewir şîdeto ke hemverê cinîyan yeno kerdiş tesaduf nîyo, polîtîk o."

 

'Nimûneyê ci Mêrdîn de ame cuyayîş'

 

Serape va şîdeto ke qalê ci kenê û nê nimûneyan ra tewr balkêş Mêrdîn de ame cuyayîş û wina va: "Cinîyêke ciwan Mêrdîn de rastê tecawizê polîsêke amî. Pêwa hema hewldayîşî seba ke huqûq nêame bicaardiş, polîso tecawizkar beraet kerdî. Rojawanê Tirkîya de tu rewşêke halo îstîsnayî çin o. La serê na cografya de rewşêke halo îstîsnayî esto û îhlalkerdişê heqan xeylê zêde bîyê. Dewlete kesê ke binê banê aye de yê û seba aye xebityenê bê ceza verdena. No zî parçeyêke OHALî yo."