ŞIRNEX - Şirnex de viraştişê awanîyê TOKÎyan dewam kenê û cinîyê Şirnexî reaksîyon mojnayî qerarê rijnayîşî û wina vatî: "Ma serê herra xo ra nêşinê cayêke bîn. Ma tarîxî ke hewl danê bidê xovîrrakerdiş, ma do nêdê xovîrrakerdiş."

 

Şirnex de 14ê Adara 2016 de qedexeyê tebervejyayîşê kuçeyan aêe îlankerdiş û 8 aşmî dewam kerd û wextê qedexeyan de sera 70ê bajarî ame wêrankerdiş û reyna zî şarî bajarê xo terk nêke û bi aşman derûdor de cuya bî. Bajarê ke rijnayîş û viraştişê TOKÎyan hema dewam keno, taxê Yeşîlyurt, Bahçelîevler, Gazîpaşa û Dîcleyê seba keyeyê ekîbê girêdayê Wezaretê Bajarwanî û Derûdorî raporo saxlem dayo zî qerarê rijnayîşî da. Nîno zanayîş ke do rijnayîşê 300 keyeyan kenga virazyê û cinîyan va do heta peynî hemverê rijnayîşî têkoşîn bikerê.

 

'Seba ke nêzdîyê tabure yê wazenê birijnê'

 

Asya Galîpa ke taxa Gazîpaşa nişne ro dîyar kerde ke prosesê qedexeyî de cayê cîya mendê û wina va: "Dimayê qedexe ma amey, heme keyeyan wêran kerdibî. Çîyêk nêmendib. Vernê de raporo saxlem dayî keyeyê ma, la dima ra vatî ma rijnenê. Dimayê viraştişê keyeyê bînan biqedîyo, na rey dore do bêro înan. Seba saxlembîyayîş nê, seba ke nêzdîyê tabure yo wazenê taxe birijnê. La ma nêverdenê keyeyê ma birijnê."

 

'Merdiş vetişî rê baştir o'

 

Asya dewam de ard ziwan ke heme Kurdistan bi no hawa yeno talankerdiş û ma ganî hemverê nê têkoşîn bikerê û wina va: "Ma wazenê Şirnex de bimanê. Pişta Erdoganî do teqez bişikyo. KAm yeno wa bêro ma do destûr nêdê rijnayîş. Ma do xo bidê vernîye kepçeyan. Merdiş vejyayîşê Şirnexî ra hîna baş o."

 

'Nêeşeknê rêçe xoverdayîşî bidê xovîrrakerdiş'

 

Cinîyêke xo sey ‘Kurdistan’ da naskerdiş da zanayîş ke kes nêeşkeno biko mabêne aye û herra aye û wina va: "Ma nêwazenê keyeyê ma bêrê rijnayîş. 4 domanê min ê qij estê. Sewbînî kesêke mi çin o. Dimayê pêrodayîşan ez ameya, ez nêeşkewa keyeyê xo tamîr bikerî. Ma bi hetkarî û piştdayîş hîn çî kerdî. Eke bêrê keye birijnê, wa bêrê mi û domananê mi bikerê çale hema newe keye birijnê. Bi aşman tîya heme çî kerdî. Her tewir polîtîka cerîbnayî. Bi desan kesî ameyî qetilkerdiş. Nika zî yenê keyeyê ma talan kenê. Nika zî rêçe xoverdayîşî danê xovîrrakerdiş. Şarê Kurd do qirkerdiş xo vîr ra nêkerê."