Safiye Alagaş

 

AMED - Camêrdo bi nameyê S.B. serê medyaya komelî de hemverê domana 14 serrî îstîsmaro zayendî kerd û hetê polîsan ra ame veradayîş. Pêwa talîmatê dadgehe seba ke nîno amadekerdiş her roniştiş de yeno taloqkerdiş.

 

Amed de Çeleyê 2014 de domana 14 serrî şî verê pîyê xo H.Ç û va kesêke bi rumuzê ‘Songul Akdogan’ ser çapemenîyê komelî aye nêrehet keno. H.Ç mesajê facebokî ewnîyeno û îstîsmaro zayendî ferq keno. Dima ra kêna xo gêno û şino Serdozgerîya Komara ya Amedî. Dimayê gerrekerdişî îfadeyê doman û pîyê aye yeno girewtiş û cigêrayîş yeno destpêkerdiş. Mudirîyê Şubeyê Têkoşînê Sucê bi Sîberî ra xo resnayê kesa/o ke  rumuzê Songul Akdogan xebitnayne û numareyê IP'î cigêrayîş kerdî. Ame tespîtkerdiş ke no hesab tarîxê cîya de cafeya înternet de ameyo akerdiş. Eynî wextî de ofîsê şîrketî înşat û înternatê keye de zî facebook akerdo.

 

Serbest ame veradayîş

 

Ame tespîtkerdiş ke keso bi nameyê S.B yo 41 serre yo. Dimayê cigêrayîşan S.B ame tepiştiş û dima ra îfadeyê ey yê emnîyetî ame veradayîş. Dozgerîya Komara ya Amedî cigêrayîşê xo temam kerd û Hezîrana 2016 de îdianame temam kerd.

 

Dozgerîye îfadeyê keyeyê domane rast dî û va seba dewa abibo delîlî qîm kenê. Dozgerîye îstîsmarbîyayîşê domane ra 3 serran heta 8 serran ceza waşt.

 

Hîrên roniştişê dewa de gumanbar S.B bê tepiştiş ame hukmkerdiş û domana mexdure zî beşdarê roniştişî nêbî. Pêwa talîmatê dadgehe gumanbar û pîyê mexdure H. Ç nêameyî amadekerdiş. Semedo ke beşdarê dewa nêbî, dosya de averşîyayîşêke nêvirazya û demêke yo dosya yena taloqkerdiş.