Melîke Aydin

 

ÎZMÎR - Mustafa Budak qetlîamê 10ê teşrîna verêne yê Anqara de cuyê xo vînî kerd. Hanîfe Budake ke cinîyê Mustafa Budakî ya reaksîyon nîşan daye padayişê Komeleya Piştîdayiş û Aştî ya 10 Teşrîna Verêne ke hetê keyeyan ra ameybî akerdiş. Hanîfe dîyar kerde ke ambulas senî ke erey ameyî, komele zî amey padayiş.

 

Keyeyê kesê ke qetlîamê 10ê teşrîna verêne de Anqara de cuyê xo vînî kerdî, Komeleya Piştîdayiş û Aştî ya 10ê Teşrîna Verêne awan kerdî û komele amey padayiş. Keye reaksîyon nîşan dayî padayişê komele ro. Mustafa Budakî qetlîamê Anqara de bi giranî birîndar bîbî û badê 22 aşman 25ê hezîrana 2017î de cuyê xo vînî kerdbî. Babete ser o cinîyê Budakî, Hanîfe Budake qisey kerde û qiseykerdişê xo de dîyar kerde ke dewlete nameyê aştî ra zî tersena û cok ra komele padaya.

 

Hanîfe qiseykerdişê xo de qala qetlîamê Garê Anqara kerde û wina va: “Ez nêeşkena şêra Anqara. Hedîse ra dima ez qet nêşîya Garê Anqara. Labelê se beno wa bibo ma do têkoşînê xo dewam bikerî. Komele û sewbîna heme cayî bêrî padayiş daxî ma fek têkoşînê xo ra vera nêdanî.”

 

‘Nameyê aştî ra tersenî’

 

Hanîfe dewamê qiseykerdişê xo de wina va: “Mêrdeyê mi 22 aşmî badê qetlîamî cuyê xo vînî kerd. Ma heme keyeyan reyde têkilîyê daîmî ronayî. Dewlete padayişê komeleyan de wazena ke mudaxeleya doze bikera. Komele bêra padayiş daxî helbet do reyna bêra akerdiş. Ma nêtersenî.”

 

‘Tirkîya bîya welatê qetlîaman’

 

Hanîfe qiseykerdişê xo yê peyênan de wina va: “Pirsûs, Amed û Anqara nînê vîrîkerdiş û nînê efukerdiş. Embazê ma yê ke birîndar bîyî dîyar kenî ke do seba aştî reyna şêrî. Dewlete nêeşkena aştî asteng bikera. Ma do hetê aştî de israr bikerî. Komeleyê ma çiqas bêrî padayiş zî ma do reyna akerî.”